Deanuvuonas leat váralaš gássabohtal rievdan gáddái, olbmot gohččojuvvojit riŋget heahtenummarii 110 jus gávdnet dákkár bohttaliid.
Deanuvuonas leat váralaš gássabohtal rievdan gáddái, olbmot gohččojuvvojit riŋget heahtenummarii 110 jus gávdnet dákkár bohttaliid.
Márjjávákkis, Deanuvuonas lea gávdnon okta gássabohtal man Deanu dollačaskadeaddjit leat viežžan. Maŋimus áiggiid leat Finnmárkku rittu fiervváin gávdnan máŋga dákkár bohtala maid siste lea váralaš gássa mii álkit sáhttá buollát.
– Jus olbmot gávdnet gássabohttaliid, de fertejit dieđihit báikkálaš buollinčaskadeddjiide dahje riŋget 110 telefunnummarii, ávžžuhit Deanu gieldda neahttasiiddus.
Industriija gássabohttalat
Gássabohttaliin lea propánagássa. Olbmot ostet ja geavahit propánagása ruovttuin, muhto dát gássabohttalat mat rivdet gáddái leat rehkenastojuvvon industriijageavaheapmái iige dállodollui.
– Eat dieđe vel makkár stánddas bohtalat leat, muhto jus olbmot rádjet ja vurkkodit bohttaliid gealláriin, de dat sáhttet suođđat ja buollát, čállá Deanu gielda.
Sáddejuvvon Dánmárkkus Islándii
110 guovddáš lea guorahallan ja gávnnahan ahte bohttaliid lea muhtin Dánmárkku fitnodat diibmá sádden, ja dat galge Islándii fatnasa mielde.
– Jođedettiin Islándii ribahedje 2 kontainera áhppái. Sii ribahedje oktiibuot 600 gássabohttala merrii. Eanaš dáin bohttaliin leat mearabotnis, muhto sáhttet rievdat gáddái váikko gos Davvi-Norggas. Dat lea dan duohken makkár dálki ja biekkat leat, muitaluvvo bohttaliid birra.
Journalista: Ristin Eira
vikar3@avvir.no
