Nuorta-Finnmárkkus leat unnit konfliktaáššit go diibmá dán muttos áiggis, muhto riikadásis gal lassánit áššit konfliktaráđiin.
Nuorta-Finnmárkkus leat unnit konfliktaáššit go diibmá dán muttos áiggis, muhto riikadásis gal lassánit áššit konfliktaráđiin.
Dássážii dán jagi leat 35 ášši dieđihuvvon Nuorta-Finnmárkku konfliktaráđđái. Lohku lea njiedjan diimmá rájes go dalle ledje 52 ášši dieđihuvvon konfliktaráđđái.
– Midjiide leat dieđihuvvon 22 ráŋggáštusášši ja 13 siviilaášši. Olbmot váldet ain seamma dávjá minguin oktavuođa, muhto politiijat sáddejit unnit áššiid dál go ovdal, čállá Nuorta-Finnmárkku konfliktaráđđi preassadieđáhusas.
Eanaš 15-25 jahkásaččat konfliktaráđis
Nuorta-Finnmárkku konfliktaráđđi lea gieđahallan golbma ášši dán jagi mas nuorat 15-18 jahkái leat seaguhuvvon. Eanaš áššiide, mat dieđihuvvojit konfliktaráđđái, leat olbmot gaskal 15 ja 25 jagi seaguhuvvon. Eatnašat leat dievdoolbmot, 38 olbmos leat ovccis nissonolbmot.
Norggas gal lassánit
Riikkadásis lassánit konfliktaráđi áššit. Dássážii leat 3876 ášši dieđihuvvon Norgga konfliktaráđiide, áššit leat lassánan 421 ášši diimmá rájes. Veahkaválddálašvuođat leat lassánan 764 áššis 939 áššái, ja narkotihkaáššit ges leat lassánan 32 áššis 124 áššái. Norggas leat 22 konfliktaráđi ja 550 soabadalli.
