Danin leat johtolatpolitiijat eanet oidnosis go muđui. Miehtá Davvi-Norgga leat politiijat bearráigeahččan biillain maŋimuš beivviid, máŋggas leat sáhkohallon ja massán biilavuodjinkoarta.
Danin leat johtolatpolitiijat eanet oidnosis go muđui. Miehtá Davvi-Norgga leat politiijat bearráigeahččan biillain maŋimuš beivviid, máŋggas leat sáhkohallon ja massán biilavuodjinkoarta.
Suoidnemánu 1. beaivvi rádjái ledje unnit jápminlihkohisvuođat go diibmá Norgga johtolagas, muhto suoidnemánus leamaš garra álgu.
– Guđas leat jo jápmán johtolagas dán mánus. Leamaš lossa álgu dán mánus, ja sávan ahte ná ii joatkkašuva, lohká johtolatpolitiijaid jođiheaddji Runar Karlsen.
Norgga johtolatpolitiijaid jođiheaddji Runar Karlsen. Govven: Politiija
Eanemus lihkohisvuođat geasset
Johtolatpolitiijat bearráigehččet johtolaga birra jagi, muhto geasset leat eanet oidnosis go muđui.
– Geasset leat eanemus lihkohisvuođat, danin lea dehálaš čađahit bearráigeahčuid. Bearráigeahčut galget eastadit lihkohisvuođaid. Jus mii nagodit bissehit vearredahkkiid, de hehtet maiddái muhtin lihkohisvuođaid, čilge Karlsen.
Davvi-Norgga bearráigeahčut
Go geahčada Davvi-Norgga politiijaguovlluid politiijalogga, de dieđihuvvojit máŋgga báikkis leamaš bearráigeahčut maŋimuš jándora. Nuorta-Finnmárkkus sáhkohalle guhtta biilavuoddji go vudje beare johtilit Sáttováris Unjárgga gielddas. Suoidneleavššás, Fálesnuoris maiddái sáhkohalle guđas leahtu geažil. Romssa ja Báhcavuona gaskkas leat politiijat máŋga bearráigeahču doallan mannan ija, oktiibuot golbma dievddu masse biilavuodjinkoarta go vudje menddo jođánit. Harstad gávpoga olggobealde sáhkohalle čiežas ikte go girddihedje guovllus gos lea lohpi vuodjit 50 kilomehtera diimmus, Muofis ges ožžo golbma biilavuoddji sáhku. Bådådjos ges duoguštedje politiijat ovtta biilavuoddjinkoarta go vuoddji vujii gárrenoaivvis. Nuppis, gean politiijat ges bissehedje, ii lean dohkálaš vuodjenkoarta.
Čielga rávvagat
Norgga johtolatpolitiijaid jođiheaddji, Runar Karlsen lohká alcceseaset rávvagiid biilavuddjiide vai eastadivčče lihkohisvuođaid johtolagas.
– Állet vuoje menddo johtilit, muitet váldit bottu geassebáhkkasis, állet čađat váralaš meaddelvuodjimiid, geavahehket biilaboahkána ja állet eisege geavat gárrenmirkkuid go vánddardehpet johtolagas. Jus dáid rávvagiid čuovvu, de lea olu dáhkon eastadanbarggus, rávve son.
