-Almmuhus-
OĐĐASAT- Doarggistin gal dego lasta

– Doarggistin gal dego lasta

-

-

Aksel Johannes Hætta ja Nils Rune Eira báhčaleigga nu bures ikte ahte beasaiga viidásit njuolga NM-loahppagilvvuide, vaikko Aksel lohka iežas leamaš hui balus.

Guovdageainnu Bivdin-ja guolástansearvvi miellahttut Aksel Johannes Hætta ja Nils Rune Eira searvvaiga ikte dán jagáš Norggameašttirgilvvuide Čuvošluovttaguolbanis (Kvenvikmoen). Bivdotrap-gilvvohallamiin galge báhččit deaivat leairaduvváid trapšiljus, ja dat gal manai goappešagain hui bures.

 

Deaivvaiga measta buot

A-luohká báhčči Nils Rune ja B-luohká báhčči Aksel Johannes leigga hui deaivilat vuosttaš vuorus, ja goappešagat bážiiga 49 leairaduvvá, mas leat oktiibuot 50. Dáinna olahusain beasaiga Guovdageaidnolaččat viidásit eahkesgilvvuide. Eahkesgilvvuin ges deaivvai Aksel Johannes buot vejolaš leairaduvváid, ja Nils Rune deaivvai buot earret go guokte, čállá Altaposten.

 – Lean hui duhtavaš iežan olahusain vaikko ledje guokte maid in deaivan, lohka Nils Rune Altapostenii, ja illuda NM-loahppagilvvuin báhčit lávvordaga.

 

Lei balus

Aksel Johannes, gii lea báhčán dan rájes go lei 9-jahkásaš, lea maid duhtavaš iežas bohtosiin vaikko lei gal balus:

 – Mu mielas manai hirbmat bures. Lean dovdan hárjehallamiin maŋemus áiggiid ahte lean buori báhčinfoarpmas, ja ledjen bures ráhkkanan NM-gilvvuide. Mus lea buorre áigodat leamaš dán jagi – in sáhte leat duhtameahttun go deiven 74 oktiibuot 75 leairaduvvás. Ledjen gal issoras balus loahppagilvvuin, doarggistin dego lasta. Liikká nagodin fokuseret, ja eahkesgilvvuin deiven de buot, lohka Aksel Johannes Ávvirii.

Son lea ilus go nagodii nu bures báhčit vaikko dovddai hirbmat deattu iežas nalde.

 – Mus lea hui buorre dovdu dál ja áiggun buriin oamedovdduin vuoiŋŋastit lávvordahkii, dassái loahppagilvvut álget. Dalle gal beassat albmaládje gilvvohallat golli vuoitit, mojohallá Aksel, geas lea mihttun fásket NM-medálja.

-Almmuhus-