Vaikko árktalaš guovlluin leat ihtigoahtán niranasat, de eat dárbbat mii ballat dain.
Vaikko árktalaš guovlluin leat ihtigoahtán niranasat, de eat dárbbat mii ballat dain.
Dán geasi leat niranašat leavvan davvelii go goassege ovdal, ja gieskat čálii Ávvir go beatnagis gávdnui niranas Guovdageainnus. Leat lunddolaš čilgehusat manne dát divri lea oidnogoahtán árktalaš guovlluin:
– Olbmot mátkkoštit dávjjit go ovdal, ja ovttaskas mearkkašumiid bokte leat oaidnán ahte niranas čuovvu lottiid ja viessoelliid mielde davás, muitala Kainuu EJB-guovddáža divredutki Reima Leinonen Yle Sápmái.
Ii lassán davvin
Muhto mii eat dárbbat gal dainna heađáhuvvot, go niranas ii ceavzze guhká galbma sámiguovlluin.
– Niranasat sáhttet gal birget dálvvi davvin, muhto dat eai ceavzze lassánit galbma árktalaš guovlluin. Geasset dat gáibida lákta ja liegga geasseilmmi, báhkasin dat náđđu ges eatnanvuollái, muitala Leinonen.
Unnán njoammunvárra
Niranas-divrráš dagaha balu go sáhttá njoammudit sihke olbmuide ja elliide dávddaid, muhto Leinonen ii loga dárbbašit leat fuolas das:
– Olbmot sáhttet leat ráfálaš mielain, go eanaš niranasain eai leat dat bakteriijat mat njoammudahttet várálaš vuoiŋŋamašfebera. Dain guovlluin gos leat ollu niranasat ja eambbo njoammunvárra, doppe boahkuhuvvet olbmot borrealis-nammasaš infekšuvnna vuostá amas sidjiide njoammut dávddat, lohka son.
