-Almmuhus-
OĐĐASATOvddeš politihkkár geassán guoddaleami

Ovddeš politihkkár geassán guoddaleami

-

-

Ikte mearridii almmái guhte lea dubmehallan giddagassii go lea illástan moarsis, ahte ii dattege guoddal duomu. Guoddalanášši lei odne galgat álgit.

Ávvir čálii mannan bearjadaga ahte Sis-Finnmárkku diggegoddi lea dubmen muhtin badjel 40-jahkásas dievddu guovtti jagi giddagassii go illástii iežas ovddeš ovttasássi máŋga jagi.

Almmái dattege lei guoddalan duomu ja odne lei diggi galgat meannudišgoahtit guoddaleami.

Háliida bisuhit ovttasbarggu

iFinnmark neahttaaviissa dieđuid mielde lea dievdu leamaš njunnošis Finnmárkku politihkas ja son lea maid ovddeš ráđđehuspolitihkkár. Dál čállá neahttaáviisa ahte almmái lea geassán guoddaleami.

 – Guoddaleapmi lea gesson, dieđihii albmá bealušteaddji Bjørn Philipson Finnmark Dagbladii ikte.

 – Moai ledne obbalaččat árvvoštallan ja mun lean ovttasráđiid iežan klieanttain gávnnahan ahte ášši berre geassit, dadjá son ja muitala duogážin leat go su klieantta háliida bisuhit buori gulahallama ja ovttasbarggu mánáid dáfus.

 

– Geahpádus

Advokáhtta Gisle Loso galggai ovddastit albmá ovddeš moarsi ja sudno mánáid guoddalanáššis.

 – Mu klientii lea geahpádus beassat ođđa diggevuorus. Lea álot lossat diggot, dadjá Loso Finnmark Dagbladii.

 

Dál go almmái ii guoddal ášši de dat mearkkaša ahte son šaddá ovcci mánu čohkkát giddagasas. Son ii dubmehallan máksit buhtadusa, muhto ferte máksit 10 duhát ruvnno áššegoluid ovddas.

-Almmuhus-