Seammás go Guovdageainnus leat eanemusat bargguhisvuođas, de doppe leat 19 rabas virggi almmuhuvvon. Thon Hotealla direktevra ii jáhke guovdageaidnulaččaid ohcat virggiide go dinejit buorebut NAV:s go barggus.
Seammás go Guovdageainnus leat eanemusat bargguhisvuođas, de doppe leat 19 rabas virggi almmuhuvvon. Thon Hotealla direktevra ii jáhke guovdageaidnulaččaid ohcat virggiide go dinejit buorebut NAV:s go barggus.
Cuoŋománus lei Guovdageainnu suohkanis eanemus bargguhisvuohta, doppe ledje 6,7 proseantta ássiin barggu haga, dan dieđihii NAV vuossárgga. Liikká leat suohkanis dál 19 rabas virggi. Guovdageainnu Thon Hoteallas leat guokte dáin.
– Leat olu ohccit virggiide muhto leat aivve olgoriikkalaččat ja olggobeale olbmot ohcan. Orro ahte dáppe olbmuide lea váttis čatnat iežaset ollesáigge bargui ja mii eat sáhte virgádit olbmuid geaid eat dieđe leat go boahtte vahkos barggus vai eai, dadjá hotealla direktevra Knut Vidar Alseth.
– Váttis NAVain gilvalit
Alseth jáhkká leat máŋga siva dasa go eai oaččo báikkálaš olbmuid bargguide.
– Mis ii soaitte dan mađe alla bálká ahte olbmot guđđet NAVa ruđaid min ovddas. Lea váttis go NAV šaddá stuorámus gilvaleaddji bargomárkanis. Dasa lassin lea ovdamearkka dihte serverenbargu lossa bargu, dávjá šaddá bargat gitta idjii ja serverejeddjiiguin ja bárabargiin lea dávjá bargu dalle go earáin lea luopmu. Jus dalle it hálit bargat de dieđusge it álgge serverejeaddjin, čilge Alseth.
Su mielas ii leat buorre go nu olu olggobeale olbmuid šaddet bálkáhit.
– Turisttat ja guossit maid ohcalit báikkálaš olbmuid hoteallas. Ja mii livččiimet maid sávvat bálkáhit báikkálaš olbmuid, dat livččii buoremus. Lea measta suorggahahtti go ná lea šaddan, dadjá son.
Ii leat eará sajis vásihan dán
Bargguhisvuođalogut Finnmárkkus ja viđa eará fylkkas leat njiedjan, muđuid riikkas lassánii bargguhisvuohta. Guovdageainnus maid lassánii bargguhisvuohta njukčamánu ektui, doppe leat birrasiid 120 olbmo barggu haga. Jus dál fitná NAV ruovttusiidduin geahččamin de oaidná ahte Guovdageainnus leat 19 rabas virggi, eanaš daid virggiide gáibiduvvo alit oahppu. Thon Hotealla virggiide ii gáibiduvvo dat, liikká guovdageaidnulaččat eai oza hotellii bargui.
– Mun bohten Guovdageidnui bargui golmma jagi áigi, ja vuosttaš maid fuomášin lei ahte lea váttis oažžut báikkálaš olbmuid bargui deike. Dan seamma in leat vásihan eará sajiin gos lean bargan, muitala Alseth.
Dál leat hoteallas dušše 30-40 proseantta bargiin eret Guovdageainnus.
Finnmárkulaččain unnán oahppu
NAV Finnmárkku ossodatdirektevra Eva-Lill Johansen Margit muitala Finnmárkulaččain obbalaččat leat unnit oahppu go muđuid riikkas. Guovdageainnu NAV-jođiheaddji Kent Ailo Hætta ges lohká Guovdageainnus unnán dakkár virggiid leat maidda ii gáibiduvvo alla oahpu. Dan son navdá leat váldosivvan dasa go leat olu rabas virggit seammás go lea bargguhisvuohta.
– Finnmárkkus lea váttis virgádit olbmuid rabas virggiide, dat boahtá olbmuid oahppodásis. Danne šaddet viežžat bargiid olgoriikkain, čilge Margit.
– Friddjavuohta dehálaš guovdageaidnulaččaide
Guovdageainnu NAV-jođiheaddji Kent Ailo Hætta lohká ahte Guovdageainnu Thon hotealla direktevrra dáidá riekta vuohttimin go lohká váttis oažžut olbmuid fástavirggiide.
– Jua dat gal sáhttá duohta, erenoamážit jus olbmot bohtet boazodoalus de leat hárjánan stivret iežaset árgabeaivvi ieža, dadjá Kent Ailo Hætta. Son jáhkká dán friddjavuođadovddu leat dehálažžan guovdageaidnulaččaide:
– Sis soitet eará árvvut go muđuid servodagas, gos fástabargu ja sisaboahtu lea dehálaš. Sii soitet ovdalii vuoruhit ieža stivret áiggi ja leat maid beroštuvvan meahcástallamis ja jus fástabarggu váldá de han ii astta dan šat nu dávjá.
Dán lohká Eva-Lill Johansen Margit leat hástalussan Sis-Finnmárkkus, erenoamážit dakkár gielddaide gos leat olu boazodoallit.
– Boazodoallu dárbbaša gaskkohagaid olu bargiid, ja de fas leat áigodagat goas eai atno nu olu bargit. Nu soitet olbmot háliidit váldit eará bargguid muhto liikká leat mielde árbevirolaš bargguin muhtin áigodagaid.
Govven: Berit Marie Lise Eira
Geahččalit náitit
NAV Guovdageaidnu lágidii gieskat bargodeaivvadeami gosa ledje bovden bargoaddiid ja bargguhis olbmuid. Ulbmil dainna
deaivvademiin lei náitit dáid nu ahte eambbosat besset bargguide.
– Dan deaivvadeami geažil ožžo golmmas-njealjis barggu nu ahte mii lihkostuvaimet deaivvademiin, čilge Hætta.
NAV geahččala oažžut lagat gulahallama bargoaddiid ja bargoohcciid gaskkas. Danne lágidit ge diekkár deaivvademiid go Guovdageainnus gieskat.
– Dákkár deaivvademiiguin geahččalat čalmmustahttit bargoohcciide ahte maid bargoaddit gáibidit, sii besse bargoaddiiguin gulaskuddat ahte atnojit go buorit árvosánit vai leago deháleappot rivttes áigái boahtit bargui ja nu ain, čilge NAV Finnmárkku ossodatdirektevra Eva-Lill Johansen Margit. Danne leat ge odne Kárášjogas deaivvadan Finnmárkku bargomárkanfitnodagaiguin.
– Mii ráŋggáštat jus it vuostáiváldde barggu
NAV Finnmark direktevra dattege ii jáhke gal NAV leat bargoaddiide gilvaleaddjin.
– Beaiveruhtanjuolggadusaid mielde sáhttá muhtimin gánnáhit eallit dušše beaiveruđaiguin ovdalii go váldit mahkáš oasseáiggebarggu. Dát lea juoga man birra mii diehtit, muhto mii geahččalit neavvut olbmuid váldit bargguid go dat sáhttá buktit fástabarggu. Muhto in jáhke NAV-ruđaid sáhttit gilvalit gal bargoaddiid bálkkáiguin go guoská ollesáiggebargguide, oaivvilda Margit. Son muitala NAVa ráŋggáštit olbmuid geat biehttalit váldimis bargofálaldagaid.
– Jus leat bargoohcci ja oaččot beaiveruđaid muhto biehttalat váldimis vuostá bargofálaldagaid de mii galgat rievtti mielde ráŋggáštit sin ja 8 vahkku orrut beaiveruđaid mávssetkeahttá. Dát lea váikkuhus man garrasit galgat geavahit, go ulbmil han lea eatnašiid oažžut bargguide, dadjá son.
