Loddejeaddji válddahallan ja áššáiduhtton

Iđđes eai lean vel váldán gitta ovttage, muhto beaivvi mielde rievddai dilli. Dál lea okta dievdu áššáiduvvon lobihemiid lodden, ja nuppi olbmá leat vel viežžame politiijaid lusa ja galget dutkat.

Áššáiduvvon dievddus leat duoguštan birrasiid logi bissu, fatnasa, fanasmutuvrra, čohkkánlottiid, ja eará biergasiid.

 – Mii eat leat gal duoguštan ovttage čáhcelotti akšuvnnas, muitala Boazopolitiijahoavda Per Valved ifinnmark áviisii.

Ohcan dievddu

Politiijat leat ohcan dievddu ja mannan viesus vissui jearahallat leat go Mierona ássit oaidnán maidege lobihemiid dáhpáhuvvan.

Sii maid bissehedje visot biillaid mat vudje sisa Skolebukt luotta.

Heajos bargovuogit

Guovdageainnu suohkana várresátnejođiheaddji Hans Isak Olsen, gii ieš lea loddejeaddji, ii loga báljo jáhkkit maid gullá ja oaidná sosiálamediain mii muitaluvvo ášši birra.

 – Deattuhan ahte in leat gullan váldoolbmuin mii duođai lea dáhpáhuvvan, nu ahte mun in nagot jáhkkit loddejeddjiid dieinna lágiin ohcet. Ammahal ferte leat eambbo duođalaš duogáš áššis. In nagot jáhkkit báljo ahte dieinna lágiin ja nie olu politiijaid sáddet loddejeddjiid maŋŋái, logai son Ávvirii iđđes ovdal go oktage lei áššáiduhtton áššis.

Dábálaš bargovuohki

Valved muitala leat dábálaš dutkanvuogit maid sii leat čađahan Mieronis disdaga. Son lohká ahte go sii fuomášedje ahte lea lobihis lodden, dalle sii fertejedje maid bidjat johtui barggu váldit gitta sin ja maiddái geahččalit čohkket duođaštusaid.

 – Dan oktavuođas lei dehálaš geahččalit oažžut eambbo dieđuid, ja mii de geahččaleimmet oažžut lassi dieđuid ássiin Mieronis. Danin mii finaimet viesuin, ja maid bisseheimmet muhtun biilla Mierona luotta alde. Mun lean ožžon raportta min politiijabálvváin, ja sii leat dušše hupman rávisolbmuiguin, ja leat maid smáđáhkkásat leamašan go leat fitnan viesuid luhtte dahje hupman olbmuiguin geat vudje Mierona luoddaráigge, lohká son.

Ihttá báberáviisas beasat lohkat maid politihkkárat oaivvildit mannan ija politiijaakšuvnna birra.