-Almmuhus-
OĐĐASATÁrvala doaibmabijuid maiguin geahpedit boraspirevahágiid

Árvala doaibmabijuid maiguin geahpedit boraspirevahágiid

-

-

Guovddášbellodat buvttii odne árvalusa Stuorradiggái maiguin sáhtašedje geahpedit sámi boazodoalu boraspirevahágiid.

– Mun lean sákka fuolastuvvan dasa ahte olles máttasámi kultuvra áito go boazodoallu sáhttá nohkat boraspirepolitihka geažil, dadjá Guovddášbellodaga parlamentáralaš jođiheaddji Marit Arnstad preassadieđáhusastis.

 

Árvalit báhčit eanet getkkiid

Árvalusas maid lea buktán Stuorrádiggái, dáhttu Guovddášbellodat ahte guorahallo mo boraspirepolitihkka váikkuha boazodollui.

Sii dáhttot maid eanet ruhtadit doaibmabijuid guottetáiggi oktavuođas, eanet báhčit getkkiid ja árvvoštallat ođđa nállemihtuid bidjat mat gusket maiddái goaskinnállái.

 – Stuorradiggi ferte váldit iežas oasi ovddasvástádusas dasa go vásihat olu boraspirevahágiid boazodoalus. Dat doaibmabijut maid dál leat evttohan dagahivčče ahte bohccot gillášedje unnit, dadjá Guovddášbellodaga stuorradikkeáirras Mátta-Trøndelaga ovddas, Heidi Greni.

 

Jurddaša boazodolliid noađi birra

2011:i boraspiresoahpamušas ledje buot bellodagat ovttaoaivilis bidjat dárbbašlaš doaibmabijuid sihke boraspirehálddahusas ja boazodoalus dáinna ulbmiliin ahte sihkkarastit máttasámi boazodoalu dili.

– Mun jurddašan daid boazodolliid birra geat beaivválaččat gávdnet jápmán dahje bealleheakkat bohccuid, ja geaidda dát lea stuorra noađđin, dadjá Nordlándda áirras Janne Sjelmo Nordås.

– Lea eahpidahtti go máttasámi guohtumat maiddái leat getkkiid ja guovžžaid čivganguovllut. Dat dahká dili olu vearrábun, loahpaha Sjelmo Nordås.

 

-Almmuhus-