Hahkandihte eanet sámi doaktáriid ja buohccidivššáriid oaivvilda NSR sámedikkeáirras ahte oahpposadjeearit fertejit lasihuvvot ja ahte ráđđehus berre ruhtadit ođđa sámi oahpposajiid.
Hahkandihte eanet sámi doaktáriid ja buohccidivššáriid oaivvilda NSR sámedikkeáirras ahte oahpposadjeearit fertejit lasihuvvot ja ahte ráđđehus berre ruhtadit ođđa sámi oahpposajiid.
Sámedikki dievasčoahkkin gieđahallá geassemánus cealkámušaid našunála dearvvašvuohta- ja buohcciviesoplánii, dan oktavuođas evttoha NSR sámedikkeáirras Inger Elin Utsi dákkár doaibmabijuid buoridan dihte gelbbolašvuođa.
– Ráđđehus lea bivdán evttohusaid mo sáhtášii sihkkarastit doarvái bargiid, rivttes gelbbolašvuođa ja bargojuogu, dan oktavuođas evttoha NSR ahte dearvvašvuođasuorggis fertejit lasihit oahpposajiid. Mii diehtit ahte sámi doaktáriid jearahit ja ahte sámegielhálli buohccidivššárat leat vátnásat, dadjá Utsi.
– Vásihit dávddaid earáládje
Dál leat universitehtain ja allaskuvllain sámi studeantaearit, sidjiide geain lea sámegiel gelbbolašvuohta. Utsi oaivvilda dán leamaš buorrin rekrutteremis sámi doaktáriid ja oaivvilda ortnega sáhttit nannet. Son lasiha vel ahte berre maid árvvoštallot ásahit sierra sámi buohccidivššároahpu. Ja dan berrešii ráđđehus ruhtadit stáhtabušeahta bokte.
– Dákkár oahpus galggašii sámi vuolggasadji ja galggašii čađahuvvot sámegillii. Dutkamat čájehit sápmelaččaid vásihit dávddaid ja buohcama eará ládje. Pasieanttasihkkarvuođas lea maid sáhka beassat hupmat dávddaid birra iežas gillii ja rivttes konteavsttas. Dát sihkkarasttášii sámi pasieanttaide rivttes dálkuma, dadjá Utsi.
– Eai beasa eatnigillii gulahallat
NSR fuolastuvvá go sámi pasieanttat eai beasa iežaset eatnigillii gulahallat dálkundilálašvuođain. Danne beroštit maid bisuhit buori dulkonfálaldaga.
– Buoremus lea liikká ahte gávdnojit sámegielat dearvvašvuođabargit maiddái buohcciviesuin. Mii fertet muitit ahte buohcciviesuin maid galget sámegielhálli bargit. Vaikke sámi doaktára eai soaitte ge máhccat iežaset ruovttusuohkaniidda, de leat sii mielde loktemis gelbbolašvuođa gos dal de ásažežžet. Sápmelaččat ásset miehtá riikka. Dasa lassin ferte maid deattuhit ahte sámi doaktárat maid spesialiserejit ja leat resursan buohcciviesuin ja spesialistadoavtterguovddážiin, dadjá Utsi.
