Kárášjoga dáiddaskuvlla oahppi Elise Scheele lea nu ilus go lea okta dan golmma vuoitis Norggas geat besset ovddastit davviguovllu Kanadas cuoŋománu loahpas.
Kanada ráđđehus hástalii gieskat árktalaš nuoraid searvat Arctic Council’s Youth Art dáiddagilvui. Norggas lea golbma nuorra dáiddára geat besset ovddastit Norgga. Jury lea válljen Kárášjoga Dáiddaskuvlla nuppi luohká oahppi Elise Scheele ja vuosttaš luohká oahppi Signe Åhren.
Kanádai cuoŋománus
– Mun nu illosin. Ii oru oppa duohtage. Ii leat juohke beaivvi go olmmoš beassá vuoitit stuorra dáiddagilvvu Norggas ja beassat oassálastit riikkaidgaskasaš gilvvus. Dovddan sihke mun ja mu dáiddalaš bargu oažžu ánssu, lohká Elise Scheele ja lohká šaddá somá vuolgit Kanadai cuoŋománu loahpas Árktalaš Ráđi ministtarčoahkkimis Ottawas Kanadas.
Soai Signe Åhrenain leaba guktot vuoitán iežaska linočuohpan bargguin, maid leaba aiddo oahppan dáiddaskuvlla rektoris.
Dáiddaskuvlla rámis
– Mun čevllohalan issoras olu go jury lea válljen guokte dáiddára Davvi-Norggas ja maid leat min oahppit. Lea hirbmat, hirbmat somá ja buorre beaggin Kárášjoga Dáiddaskuvlii, lohká rektor Eva Aira.
Erenoamáš illudahtti leage su mielas go Elise Scheele ja Signe Åhren leaba guktot vuoitán iežaska linočuohpan govaiguin maid aiddo leaigga oahppan rektor ja dáiddár Eva Airas.
