Guovdageainnu konfirmánttaide juhket sisabeassankoarttaid vai sin bearrašat ja ristváhnemat oččošedje čohkkánsajiid konfirmašuvdnaipmilbálvalusain. Dát vuogádat suhttada váhnema Margrethe Nilsdatter Buljo, son lea gártan vuorbádit guhtemuš ristváhnemiidda várre saji.
Guovdageainnu girku lea nu gárži ahte buohkat eai čága, eai ge oaččo čohkkánsajiid konfirmašuvdnaipmilbálvalusain. Dán sotnabeaivvi konfirmerejuvvo Margrethe Nilsdatter Buljo nieida. Son lea ožžon 14 sisabeassankoartta.
– Mu mánás leat lagabui 30 fáddara. Su ristváhnemat leat náitaladdan, ja dalle leat fáddarat lassánan. Buohkat eai beasa girkui, ja mánná lea sakka beahtahallan. Ii son loga somán vuolgit girkui, lohká son.
Gártan vuorbádit
Eadneolmmoš lea gártan vuorbádit sisabeassankoarttaid, ja dán láhkai mearridit guhtemuš ristváhnemiidda várre čohkkánsajiid girkus. Dát lea Margrethe Nilsdatter Buljo mielas sakka unohas.
– Lean riŋgen sihke vuitiide ja sidjiide geat eai oaččo bileahtaid, dat lei váivvimus bargu mii gávdno. Sesten juobe guokte bileahta go mu oappás ja sivjjogis lea nubbi ristmánná, dat lei lihkku eará fáddariidda, čilge son.
Boares áhkut
Guovdageainnu girkus rehkenastet 258 čohkkánsaji. Dán logus gesset konfirmántta logu ja reasta sajiide ožžot konfirmánttat várre iežaset lagamusaide. Sis geain lea sisabeassankoarta fertejit boahtit árrat girkui, kvárta ovdal ipmilbálvalusa rahpet oainnat girku uvssaid. Dalle besset buohkat sisa, ja čohkkánsajit eai leat šat várrejuvvon. Dát vuogádat ii leat váhnema Margrethe Nilsdatter Buljo mielas man ge veara.
– Mu mielas galggašedje juohkit sajiid fáddariid mielde. Lean vásihan ahte boares áhkut bohtet girkui go leat nu sáhkkii, sii steanžádit das eai ge sirdde vaikke dihtet nuppis lea mánná dahje ristmánná konfirmántan, lohká Buljo.
Váivašuvvá
Guovdageainnus leat erenomáš olu konfirmánttat dán jagi, ja danin lágidit liige konfirmašuvdnaipmilbálvalusa. Guovdageainnu girkus lea konfirmeren golbmii guovtti vahkkoloahpas, dasa lassin lea konfirmašuvdnaipmilbálvalus sihke Mázes ja Šuoššjávrris.
– Lean masá gáhtan go bidjen nieidda vuosttaš jovkui, dalle leat eanemus konfirmánttat. Lean nu suhttan ja nu beahtahallan. In leat gillen váldit oktavuođa ge girkuin. Mu mielas lea vuogádat nu eahperehálaš go sáhttá. Konfirmašuvdna lea stuora beaivi sihke mánnái ja fáddariidda, ja dát čuohcá eanemus mánnái, lohká Buljo.
Šállošahtti
Guovdageainnu searvegotteráđi jođiheaddji Nils Henriksen muitala ahte Guovdageainnu girku láve spagga dievva konfirmašuvnnaid áigge, beassáš- ja juovlabasiid.
– Dat lea hui váidalahtti go buot ristváhnemiidda ii leat čohkkánsadji. Dát dilli leamaš guhká, muhto ii okta ge vuoruhuvvo eará láhkai. Bileahtat juogaduvvojit ja buohkat ožžot seamma olu, lohká son.
Bálbmasotnabeaivvi 26 bileahta
Liige konfirmašuvdnaipmilbálvalus lea bálbmasotnabeaivvi, muhto dalle leat dušše moattis ovccis válljen konfirmerejuvvot. Dat mearkkaša ahte juohke konfirmántta lea ožžon 26 sisabeassankoarta.
– Okta vejolašvuohta livččii dieđusge juohkit ristváhnemiid mielde, muhto nu go mii diehtit de leat Guovdageainnu mánáin eanet ristváhnemat go eará guovlluin Norggas.
Ođđa girku
Guovdageainnu searvegotteráđđi lea humadišgoahtán ohcat ruđaid viiddidit girku dahje hukset ođđa girku. Dalle ii livččii dát hástalus giksin.
– Min girku lea beare unni go leat doalut, ja girku han láve measta álo dievva go lea dábálaš ipmilbálvalus. Go mii ohcat ruđaid stádas, de jáhkkán min vuoruhit. Deike leat gal plánen hukset sihke ođđa joatkkaskuvlla ja teáhtervistti, árvidan ahte boahtit sin maŋŋel, loahpaha Henriksen.
