«GolleJietna» juoigangilvvu lágideaddji duođašta ahte dáid beassážiid ii lágit dáid gilvvuid.
Rosie Holmestrand lea máŋga jagi leamaš mielde lágideamen juoigangilvvuid beassážiid áigge Kárášjogas. Diibmá gohčodii gilvvuid «GolleJietna», mii šattai hirbmat bivnnugin.
Eai šatta gilvvut
Kárášjoga servodatvissui lei čohkken olu olbmuid, ja geahččit besse ieža jienastit vuoiti. Dán jagi Holmestrand dattege ii gearddut diimmá sukseassa.
Son čállá iežas facebook-siidui:
«Oainnán dán jagáš Kárášjoga beassášprográmmas ahte skilleduorastaga lágiduvvo GolleJietna juoigangilvu, maid Jergul Event lágida. Dat ii doala deaivvas, go in leat dieđihan Karasjok festiválii GolleJietna lágideame. Dáđibahábut ii lágiduvvo dán jagi GolleJietna juoigangilvu.»
Persovnnalaš ákkat
Ávvirii muitala son ahte leat persovnnalaš sivat dasa go dán jagi ii lágit dáid gilvvuid.
– Muhtin áššit eallimis mannet ovdalii dákkár lágidemiid, muhto lea dieđusge šállošahtti go eai šatta gilvvut dán jagi. Mun dieđán olbmot liikojedje gilvui, muhto váivvimus gal lea go Kárášjoga festiválas leat almmuhan ahte lean lágideamin gilvvu, vaikke mun in leat sidjiide duođaštan dan, čilge Holmestrand.
Mánu áigi jo almmuhuvvon
Mánu áigi almmuhedje Kárášjoga festiválat dán jagáš beassášprográmma. Das jo oidnui ahte «GolleJietna» lágiduvvo skilleduorastaga.
– Mun válden dalle oktavuođa singuin ja jerren manne almmuhit dákkár dieđuid go mun in leat duođaštan ahte dat šaddet. Mun han ledjen dušše lohkan ahte lean árvvoštallamin lágidan go gilvvuid vai in, čilge Holmestrand.
Boahtte jagi fas árvvoštallá
Muhto vaikke dáid beassážiid eai gullo ge gollejienat Kárášjogas, de lohká Holmestrand boahtte jagi árvvoštallamin baicce lágidit gilvvuid.
– Lean jurddašan ahte soaitá buoret juohke nuppi jagi lágidit dáid doaluid, čilge son.
Ávvir ii fáhten Kárášjoga Festiválaid beaivválaš jođiheaddji ságaide dán áššái.
