– Mii dárbbašit «SUPERMANN»

Almmuhus lea suohtas vugiin čállon, ja lea Leaibevuona hotealla mii ohcá dákkár erenomáš bargi gean gohčodit «SUPERMANN» dahje sáŋgárin.

– Mii dárbbašit «supermann»

Leaibevuona hotealla direktevra Heli Korhonen bohkosa njálgát go Ávvir riŋge jearrat «supermann» virggi birra.

– Lea gudnevuollegašvuođain go mii gohčodit dán bargi «supermann», go dat ferte leat dakkár bargi gii sáhttá bargat vaikko maid. Mis lei ovdal dakkár bargi gii sáhtii bargat buot ja divvut vaikko maid. Dál mii ohcat fas dakkár bargi go lea dárbu dasa, muitala Korhonen gii ii loga iežas máhttit molsut čuovgapearaid ja divvut duon dán.

Stuora beroštupmi virgái

Almmuhusas čuožžu ahte sáhttá leat dievdu dahje nisu, nuorra dahje boaris, beare lea sáŋgár. Sáŋgár ferte doaimmahit viessohoaiddárbarggu, divodit ja álkibuš snihkkenbargguid hommet.

– Leat ollugat čájehan beroštumi dán virgái, ja leat boahtán jo máŋga virgeohcama. Hirbmat suohtas go dákkár beroštupmi lea, vaikko lea máŋga vahkku ohcanáigemearrái, muitala Korhonen.

Vurdet dakkára gii ii leat áibbas A4

Sii ohcet praktihkalaš bargi, gii lea ovdal doallan veahčira, bidjan seaidnepláhtaid ja listtuid, molson hivssetnuovhllu, garrudan ja divvon bassanmašiinna. Ii dárbbat leat fágareive, muhto ferte leat áŋgir ja buorre jurddašanvuohki.

– Almmuhus muitala veháš min bargobirrasa birra. Mii leat movttegat ja humoristtalaččat. Bargi gean ohcat ferte jođánit máhttit heivehit iežas barggu ođđa doaimmaide, muitala Heli Korhonen.

Seamma hámis ohcamat

Leat muhtimat sádden ohcama mii lea seamma vugiin čállon go virgealmmuhus.

– Okta lea čállán ahte dát dat livččii sutnje heivvolaš bargu vaikko ii leat «supermann», muhto eanet dego «Batman» ja «Macgyver». Leat nu buorit ohcamušat boahtán, bohkosa Korhonen.

Loahpas sáhttá namuhit ahte almmuhusas čuožžu «Ii galgga gávdnot makkárge kryptonihtta dáppe».

Almmuhus gávdno nav.no siiddus.