Áŋgiris guollebivdi Mikkel Johan Mikkelsen Utsi gottii 900 grámmasaš dorski Ittunjárggas, ja vuittii Ávvira oaggungilvvus oaggustávrrá.
Dát vahkku lea nubbin maŋemus vahkku Ávvira guollegilvvus dán hávvái, mas sáhttá oaggunstávrrá vuoitit.
Gilvu lea bistán geasi ja mii leat juohke vahkku vuorbádan vuoiti.
Dál leat vuorbádan mannan vahkku vuoiti.
Geasseorohagas bivdá
Kája alde geasseorohagas Ittunjárggas láve Mikkel Johan Mikkelsen Utsi geasi miehtá háliidit oaggut.
Son lea áŋgiris bivdi, ja liiko mearraguliid bivdit, muhto lohká jávrris lea maid somá oaggut.
Eadni, Berit Kristine Utsi, muitala ahte son lei mielde kája alde go bárdni gottii dorski.
– Lei ovdalaš juo goddán moadde unna guoláža, ja de dohppii stuorebuš dorski. Oaččui ieš dan gáddái, lohká Utsi.
Ovdal vuoitán
Mikkel Johan searvvai moadde jagi áigi maid Ávvira guollegilvui, ja dalle maid vuittii oaggunstávrrá.
– Hui somá fas vuoitit! lohká Mikkel Johan.
Go Ávvir jearrá maid láve guliiguin dahkat, de muitala ahte láve vurket daid ja de áhčči ráhkada biepmu dain.
– Juogo leat vuoitodorski borran?
– Dan guoli eat leat vuos šaddan ráhkadit ja borrat, muitala Mikkel Johan.
Maŋemus vahkku
Dán vahkku ja boahtte vahkku sáhttet mánát vel searvat Ávvira guollegilvui.
Jus áiggut searvat gilvui de berret dán vahkku dieđihit iežat gilvui, ovdal borgemánu 19. beaivvi.
Eambbo dieđuid gilvvu birra gávnnat Ávvira ruovttusiiddus avvir.no.
