Ávvira lohkkit leat nammadan Jovsset Ánte Sara jagi 2017 sápmelažžan.
Goalmmát háve lea Ávvir bivdán lohkkiid jienastit dán jagáš sápmelačča.
Jagi 2017 sápmelažžan šattai Jovsset Ánte Sara, son oaččui 39 proseantta jienain.
Ávvira lohkkit ledje evttohan Jovsset Ánte Sara dán jagáš sápmelažžan. Ledje 16 evttohasa, ja Sara oaččui liigeeanemus jienaid.
– Dat gal lea suohtas, lohká Jovsset Ánte Sara ja bohkosa, ovdal go joatká:
– Lean oaidnán jienasteami, ja mun fitnen oappá jienasteame. Mu mielas orru oabbá olu eambbo fuomášumi buktán boazosámi áššiide.
Ávvira lohkkit ledje maiddái Jovsset Ántte oappá, Máret Ánne Sara, evttohan dán jagáš sápmelažžan. Son lea dorjon vieljas diggeáššiid čađa, ja nana fuomášumi boktán áššái.
Giitá lohkkiid
– Giittán buot lohkkiid go leat jienastan. Hui suohtas, ja dat čájeha ahte lea ášši man olbmot čuvvot. Go vel lea riektesihkarvuođas sáhka dán dikkis, dat dagaha ášši stuorábun, ii leat dušše ovtta olbmo ja bearraša birra. Šaddá eambbo sámiid rivttiid birra, lohká Jovsset Ánte Sara.
Alimusrievttis vuoittáhalai
Sara bekkii 2017:s go lea vuosttaš ja áidna badjeolmmoš gii lea stevdnen stáhta unnidangáibádusa dihtii Finnmárkkus.
Vássán jagis lei su ášši sihke lágamánnerievttis ja Alimusrievttis, gos loahpalaččat stáhta vuittii.
– Vássán jahki lea leamaš sihke suohtas ja veahá heittot maid. Muinna manná bures, dál ferte ráhkkanit viidásit doalvut ášši. Muđui árgabeaivi lea nu go dábálaččat, ii rievdda dainna duomuin, nu guhká go eai boađe rivvet mu bohccuid, lohká Sara.
Ii šat jurddašan
Juste ovdalaš juovllaid oaččui ge Sara diehtit duomu, stáhta vuittii, ja ieš vuoittáhalai.
Duopmu mielddisbuktá ahte Eanandoallo- ja biebmodepartemeantta gáibádus lea gustovaš, Sara ferte geahpedit ealus 75 heggii.
– Ledjen jurddašan ahte sáhttá boahtit. Ii lean nu šohkkan dan dáfus, go ledjen belohahkii ráhkkanan dasa.
Son ii loga jurddašan nu olu dan ášši birra šat dan rájes.
– Dat lea veahá iešmielat. Dan birra ii leat ávki jurddašit, ii dainna rievdda vaikke man olu jurddašan. Ferte oaidnit ja dahkat maid sáhttá dahkat.
Riikkaidgaskasaš duopmostullui
Sara advokáhtta Trond Biti logai maid seamma beaivvi go duopmu bođii ahte áigot guoddalit duomu riikkaidgaskasaš duopmostuoluide, ja ahte álgá dasa ráhkkanit ođđajagis.
– Mo jáhkát mannat?
– In dieđe, in duostta álgit árvvoštallat dan. Muhto sávvamis bures, lohká Sara.
Evttohan Sara
Dán jagi bivddiimet maiddái lohkkiideamet árvalit evttohasaid Dán jagi sápmelaš bálkkašupmái, ovdal go rabaimet jienasteami.
Okta sis gii lei evttohan Jovsset Ánte Sara jagi sápmelažžan, lei Marit Inga Sara Pettersen.
Son lea ge maid áŋgiruššan Sara áššis, earret eará álggahii son ruhtačoaggima Jovsset Ánte Sarai.
– Son duostilvuođain doarru stáda vuostá olles sámi ovddas, čálii Sara Pettersen evttohusas.
Lei vuordán vuoittu
– Mun ledjen vuordán ahte son oažžu dán bálkkašumi, go Sámis lea leamaš olu fokus dán áššái, ja olu olbmot leat dorjon su, ja su dehálaš ášši, lohká Marit Inga Sara Pettersen.
Su mielas lei buorre go Jovsset Ánte Sara vuittii dán, go jáhkká dan movttiidahttit nuorra olbmo. Son lohká vel ahte áigu ain doarjut Jovsset Ántte viidásit dán áššis.
1826 jiena
Sara lei jagi 2016 maid evttohuvvon jagi sápmelažžan, ja dalle son bođii nubbin, 38 proseantta jienaiguin.
Dán jagi son vuittii. Oktiibuot jienastedje Ávvir lohkkit 1826 geardde, 39 proseantta dain jienain oaččui ge Jovsset Ánte Sara.
Heaibu Gunn Rita Boine oaččui nubbin eanemus jienaid, 14 proseantta.
Evttohasat ledje buohkat beaggán vássán jagis, ja iešguđet ládje čalmmustahttán ja ovddidan sámi áššiid ja sámevuođa.
Vuoitu lea lásekaraffel man Boble Glasshytte Kárášjogas lea ráhkadan. Dasa lea čállon vuoiti namma ja jahki.
