-Almmuhus-
KULTUVRA– Veagalváldin ii leat nagodan billistit mu

– Veagalváldin ii leat nagodan billistit mu

-

-

Beassášlávvardaga ovdanbuktá Sunna Máret Utsi persovnnalaš «power-lávlaga» Sámi Grand Prix lávddis, mainna lohká iežas rupmaša váldit fas ruovttoluotta.

Sunna Máret Utsi lávke dál nuppes Sámi Grand Prix lávdái.

Vuosttaš háve lei 2014:s, guokte vahkku maŋŋá go lohká vásihan ilgadis dáhpáhusa.

Muhtun oahpis veagalválddii su, dál lea son bidjan šuoŋa ja sániid dáhpáhussii. Dainna lávlagiin áigu gilvalit SGP lávddis.

– Lean dieđusge hui balus, seammás go lea gelddolaš oaidnit mo olbmot váldet vuostá dan. Háliidan čájehit ahte ii leat billistan mu ja lea áigi váldit iežan eallima ja rupmaša ruovttoluotta, lohká Sunna Máret Utsi.

Son áigu lávlut hui persovnnalaš lávlaga mas lea namma «Mu gorut».

Guhtta sámi lávlaga leat mielde SGP-gilvvuin maid Sámi beassášmárkanat lágidit juohke jagi beassášlávvardaga Báktehárjjis Guovdageainnus.

 

Loga maid: Dá leat Sámi Grand Prix 2017 oasseváldit

 

Váldá iežas rupmaša ruovttoluotta

Lávlagis lea persovnnalaš diehtu mas Sunna Máret muitala ahte lea traumáhtalaš ja issoras ilgat vásihit seksuála illasteami.

– Lávlagis boahtá bures ovdan ahte lea mu rumaš, ii ge duolbmot mu rájáid. Dat leat diekkár lagas «power» -lávlla mii čájeha gii lea «hoavda». Lávlaga sáhttá dulkot nu movt ieš háliida, muhto das lea okta váldosáttasátni, lohká son.

 

Vuosttaš lávki

Utsi lea rahpasit muitalan dáhpáhusa birra.

– Go nagoda muitalit geasa nu dáhpáhusa birra ja oažžut veahki hálddašit dáhpáhusa, de lea ovtta lávki lávken váldit ruovttoluotta iežas rupmaša. Lea mu rumaš, ja huksegoahtit fas eallima, de čájeha maid ahte lea iežas rumaš. Leat olu dovddut lávlagis go lea iežan vásáhusa birra, čilge Utsi.

 

Dovddai iežas sivalažžan

Son sávvá iežas rabasvuođa dagahit ahte earát dustet muitalit ja váidit veagalváldima.

– Mun guhká duššindahken dan maid ledjen vásihan, ja dovden iežan sivalažžan. Vahkku manai dalle ovdal go nagodin váidit dáhpáhusa. Mus ledje lihkus olbmot ja váhnemat iežan birra geat ledje stuorra veahkkin, muitala Sunna Máret Utsi.

Son muitala ahte árvvoštalai dalle geassádit SGP:s go veagalváldin lei aiddo geavvan ja lei lossa áigodat su eallimis.

 

Hehttii iežas dovdduid

Vaikko dál lea vássán máŋga jagi, de lea veagalváldin ain juogalágan oassi su eallimis, go ii loga sáhttit dohkkehit dan mii lea geavvan, muhto lea dál ádden ahte ieš ii leat sivalaš dáhpáhussii.

– Guhká šiiten ahte lea geavvan ja hehttejin iežan dovdduid. Mun háliidan jávkadit dan tabu mii lea veagalváldimis ja ahte nagodan veahkehit earáid. Mađi eambbo rabasvuohta, dađi unnit čiegusvuohta, lohká son.

 

Guhká háliidan čállit teavstta

Sus leamašan guhká miella čállit teavstta, muhto ii leat nagodan.

Ođđajagemánus dattetge bođii dáhttu ja nu čálligođii.

Nu ilmmai lávlla «Mu gorut» mainna sávvá inspireret eambbosiid muitalit seksuála illastemiid birra.

– Háliidan ja sávan ahte veahkehan earáid geat leat seamma dilis go mun ledjen. Ii leat son guhte vásiha veagalváldima guhte galgá ballat ja heahpanit, lohká SGP oasseváldi guhte lea hui gealdagasas mo olbmot vuostái váldet lávlaga go ii loga alddis dábálaš SGP lávlaga.

 

Ášši lea vuosttaš geardde almmuhuvvon Ávvira báberáviissas njukčamánu 15. beaivvi.

 

 

-Almmuhus-