-Almmuhus-
MAGASIIDNARavggon ođđa CD-skearruin

Ravggon ođđa CD-skearruin

-

-

Ravggon musihkkajoavkku ođđa skearru almmuhuvvui Táigafestiválas Dávgeváris ovddit vahkkoloahpa.

Ovddit vahkkoloahpa almmuhuvvui Ravggon ođđa CD-skearru «Ráji ravddas» (On the Edge of the Border) Táigafestiválas Dávgeváris, Suoma bealde. Lea Tuupa Records Oy gii almmustahttá skearru. Ravggon joavkkus čuojahit Milla Elmiina Pulska, Matti Naakka, Unna-Maari Pulska, Erno Karjalainen ja Panu Klemettilä.

 

Erenomáš jietna

Jussi Isokoski guhte lea lágádusa Tuupa Records Oy hoavda, dadjá ahte jietna musihkas lea oalle earálágan eará musihkaid ektui.

– Jietna lea oalle earálágan go popmusihkas, danne go Ravggon geavaha čearddalaš rumbbu lávlagiin, dadjá Isokoski.

 

Davvi-sámegiel Folke-rock

Ravggona musihkka lea davvisámegiel Folke-rock. Isokoski sáhttá maid muitalit ahte lávlagiid čállá Milla Elmiina Pulska, guhte lea lávlu Ravggon joavkkus.

– Lávlagat leat davvi-sámegillii ja lea Milla gii čállá teavsttaid, dadjá Tuupa Records Oy hoavda, Jussi Isokoski.
Milla Elmiina Pulska ieš dadjá ahte musihkas ja lyrihkain guorahallojuvvojit dálá máilmmi jallavuođat ja olmmošvuođa ruojusvuođat, seammás mieiggastuvvo ruohttasiidda ja lundui, main oažžu fámuid.

 

Čuojahit miehtá Sámi ja Suoma
Pulska maiddái dadjá ahte sii leat čuojahan miehtá Sámi ja Suoma maŋemuš golbma jagi. Dán geasi lea joavku čuojaheamen Márkomeanu festiválas Evenáššis.
– Mii vuordit dál movttain Márkomeanus čuojahit, dadjá Pulska.


GÁRVVISTAN SKEARRU: Milla Elmiina Pulska dadjá ahte lea ilus go skearru lea viimmat gárvvis. Preassagovva: Henry Kestilä ja Emmi Karjalainen

Guhkes proseassa
Skearru almmuhuvvui ovddit bearjadaga ja galgá dál leat spotify:s.

– Lea leamaš guhkes proseassa ja leat oahppan hui olu go leat ieža ovdamearkka dihte bádden ja buvttadan, dadjá Pulska.

Ilus

Pulska dadjá ahte lea ilus go skearru lea gárvvis.

– Dál leat gal nu hirbmat ilus go skearru lea gárvvis ja háliidit giitit olbmuid geat leat leamas fárus ja dorjon ovddasguvlui, loahpaha son.

-Almmuhus-