Almmuhus

Almmuhus

Máilmmi vuosttaš sámi Drive-in-kultur­bálggis rahppo­juvvon

Sámediggepresideanta Aili Keskitalo ja sámediggeráđđi Henrik Olsen geahčadeaba galbbaid ovtta dain oktiibuot guđa kulturmuittuin mat leat kulturbálgás. Govven: Ingvild Larsen/Sametinget.

Dál beasat biillain vuojistit geahččat kulturmuittuid.  – Drive-­in-kulturbálgás leat guhtta sámi kulturmuittu mat leat galbejuvvon, ja gosa biillain lea beasahahtti, lohká sámediggepresideanta.

Almmuhuvvuon: 
Bearjadat, 14 Geassemánu, 2019 - 15:19
Fáddásánit: 

Kulturbálgá rahpama ávvu­deapmi dollojuvvui mannan duoras­taga Nordland Nasjonalparksentera gođiid luhtte, Storjordas Sáladis.

 – Ollugat geat bohtet Sáltoduoddarii jurddašit várra ahte leat lihkahalakeahtes eanadagas, muhto go dovdat historjjá ja guovllu kulturmuittuid, de ­diehtit ahte lea sámi guovlu mii lea ­geavahuvvon máŋga duhát jagi, dadjá presideanta.

 Sámediggi čilge preassadieđáhusas ahte guovllu leat bihtán­sápmelaččat, ubmisápmelaččat, julevsápmelaččat ja davvisápmelaččat geavahan.

Duktásajit, dolla­sajit, hávddit, oaffarsajit ja bivdorusttegat muitalit midjiide mo olbmot leat eallán ja guovllu geavahan.

Boazu lea leamaš, ja lea ain, deaŧalaš resursa Sálto­duoddaris. 

 

Bihtánsápmelaččaid unnán oahpes historjá

Kulturbálgá rahpama oktavuođas dollojuvvui seminára bihtánsámi historjjá birra.

– Bihtánsápmelaččat leat guhká leamaš oaidnemeahttumat, ja bihtánsámi giella ii geavahuvvo Norgga bealde. Dáruiduhttin ja iešguđetlágan politihkalaš doaibmabijut dagahedje ahte bihtánsápmelaččat bieđganedje viiddis guvlui. Dat dagai váttisin seailluhit giela ja kultuvrra. Semináras čalmmustedje bihtánsápmelaččaid unnán oahpes historjjá, kulturmuittuid ja huksenvieru.

 Kulturbálgáprošeakta lea válljen galbbaide bidjat bihtánsámegiela teavsttaid vaikke vel ii leatge normerejuvvon giella.

 – Mii háliidit doarjut barggu mii dahkkojuvvo bihtánsámegiela beali, ja go bihtánsámi historjá galgá čájehuvvot, de lea hui buorre liiba dan dahkat, dadjá Aili Keskitalo. 

 

Kulturbálggis illun

Drive-in-kulturbálgás leat ­guhtta sámi kulturmuittu mat leat galbejuvvon, ja gosa biillain lea beasahahtti.

– Kulturmuittut čájehit sámi kultuvrra máŋggalágan beliid ja iešguđet áigo­dagas. Buot boarráseamos lea bivdorusttet Vensmoenis. Elliid bivdin rokkiiguin lea vuohki mii lea geavahuvvon juo geađgeáiggi rájes 1700-loguide. Das galggai roggat čiekŋalis rokkiid maid rissiiguin čihke. Dasto vuojehedje bohccuid dan guvlui, ja muhtun bohccot gahčče rokkiide. Rusttegis leat badjel 10 rokki, ja dat čájeha ahte ollu olbmot leat daiguin bargan, čilge Sámediggi preassadieđá­husas.

 

Identitehta ja eallima luottat

–  Kulturmuittut leat identitehta ja eallima luottat. Go mii áddet iežamet ovddeš áiggi, de leat buorebut ráhkkanan dustet dálá áiggi hástalusaid, dadjá Aili Keskitalo, gii doaivu kulturbálgá šaddat illun ja ávkin báikki olbmuide, skuvlii ja turisttaide, dadjá sámediggepresideanta.

Ovdasiiddus dál