Mihttu lea viiddidit márkanfievrrideami riikkaoasis ja sihkkarastit ahte internationála searvvit guđđet ruđa báikkálaš ealáhusdoaimmaide.
Finnmárkku fylkkadiggi mearridii gaskavahku čoahkkimis ásahit Nordnorsk Filmkommisjon AS ovttasráđiid Romssa ja Nordlándda fylkkaiguin.
Filbmakommišuvdna galgá márkanfievrridit Davvi-Norgga filbmenbáikin ja rávvet buvttadeddjiid geat áigot filbmet davvin. Mihttu lea viiddidit márkanfievrrideami riikkaoasis ja sihkkarastit ahte internationála searvvit guđđet ruđa báikkálaš ealáhusdoaimmaide.
Golmma fylkka ovttasbargu
Nordnorsk Filmkommisjon AS ásaheapmi lea dan golmma davimus fylkka ovttasbargoprošeakta ja ásahuvvo álggos golmma jagi prošeaktan. Álggahuvvo ovdal go dát jahki nohká.
Ovttajienalaččat mearriduvvon
Nordnorsk Filmkommisjon ásaheapmi mearriduvvui ovttajienalaččat Finnmárkku fylkkadikkis. Politihkkárat sávvet ahte márkanfievrrideapmi riikkaoasis internationála filmmaid čađa mat leat filbmejuvvon Davvi-Norggas galgá addit positiiva lassiváikkuhusa turistaealáhussii, iige dušše báikkálaš ealáhusdoaimmaide ja filbmasuorgái.
