Sámi Grand Prixa artisttat geat ihttin galget lávlut ja juoigat Riikalávddis Oslos ledje álggos gávccis, dál eai leat eará viđas. Dat lea lágideddjiid mielas šállošahtti.
Ihttin eahket galget gávcci Sámi Grand Prix vuoiti lávlut ja juoigat Riikalávddis Oslos.
Dál eai leat báhcán go viđas go ikte geassádii vel goalmmát.
– Šállošahtti go geassádit
Riikalávddi prošeaktajođiheaddji, Andreas Ljones, duođašta bearjadaga Ávvirii ahte golbma artistta leat geassádan.
– Ikte dieđihii Per Bueng vel ahte son ii sáhte boahtit. Vuoitit gal eaba leat geassádan, soai gal leaba boahtimin, muhto aŋkke hui šállošahtti go artisttat geassádit, dadjá Ljones.
Ovtta gávdnan sadjái
Ann-Mari Andersen ja Inger Marie Nilut leaba juo ovdal dieđihan ahte eaba boađe.
Ljones ii loga iežaset gávdnan go ovtta artistta dán golbmasa sadjái.
– Lea váttis oažžut artisttaid oanehis áiggis, muhto sáhtán muitalit ahte Sara Ajnnak galgá lávlut.
Heajos johtu bileahtain
Ljonesis ii leat áibbas čielga lohku galle bileahta leat vuvdon go Ávvir hupmá suinna, muhto ii loga bileahtaid johtán nu bures.
– Ikte, go maŋemus isken, de gal eai lean vuvdon nu olu bileahtat, muhto sávvat ahte olbmot bohtet ihttin, dadjá son.
