Filbmaárvvoštallan: – Garra historjá sámi bajásšaddama birra

Muitalusa rámma lea go penšunerejuvvon sámi nissonolmmoš Elle-Márjá fas boahtá Norrlándii searvat lagas bearašlahtu hávdádussii.

Davvi-Ruoŧas beassá son maid vásihit Davviriikkaid luonddu ja sámi kultuvrra.

Eanas dáhpáhusat filmmas lea geahčestagat go Elle-Márjá bajásšattai garra dilis Davvi-Ruoŧas 1930-logus.

Rasisma lei beaivválaš ja gávdnui juohke dásis servvodagas, maiddái stáhtalaš institušuvnnain.

Elle-Márjá vásiha maid earret eará rasisttalaš «dieđalaš» oaiveskálžomihtidemiid.

Lea garra bajásšaddan internáhttaskuvlla heajos dilis, iežas váhnemiid haga.

«Geahččin ferte olmmoš oassádallat ujus Elle-Márjjáin, leaš dal heahpadasas govvejuvvome áibbas álásin ovddabealde olbmuid, oažžu rámi oahpaheaddjis dahje go báikkálaš nuorat hárdet su.» 

Dát lea unohas oassi Ruoŧa historjjás, muhto man lea dehálaš čuvget.

Lihkus gávdnojit maid buoret oasit ja romantihkalaš áiggit Elle-Márjjá bajásšaddamis, nu go veahá váttes oktavuohta Ruoŧa gaskaklássa bártniin.

Davvi-Ruoŧa eanádat dahká drámái poehtalaš ja majestehtalaš birrasa.

Filbmamusihkka lea maid hui fiinnis ja dahká hui epihkalaš duogáža.

Sisdoallu geasuha sakka, muhto muhtumin manná veahá njozet ja dego bisána, muhto buot orru autenttalaš.

Seammás háliidivččen maid diehtit eanet mii Elle-Márjjáin dáhpáhuvai nuorravuođas dassážii go ollesolmmožin šattai.

«Goitge lea dát ollislaš ja garra drámá mii ii goassege šatta beare sentimentálan ja lossadin.» 

Filbma fátmmasta maid olu dovdduid ja miellalágiid.

Ruoŧa mánusčálli ja rešissevra Amanda Kernell (r. 1986) hirpmástuhttá sakka iežas vuosttaš filbmarešissevrabargguin ja čájeha duođaid taleantta gaskkustit váttes historjjá.

Ovdal lea son ráhkadan máŋga oanehisfilmma, earret eará «Stoerre Vaerie» (2015), mii lea «Sameblod» filmma vuođđun.

Ferte maid rámidit neavttára Lene Cecilia Sparroka (eret Davvi-Trøndelágas) gii neaktá 14-jahkásaš Elle-Márjjá.

«Son čájeha olu dovdduid, nu go udjuvuođa, burrodaga, suhtu, morraša ja ráhkásmuvvama. Ii son álo daja nu olu, muhto son nákce čájehit olu dušše geahčastagain.»

«Sameblod» lea Ruoŧa, Norgga ja Danmárkku oktasaš buvttadeapmi, mii lea ožžon olu riikkaidgaskasaš beroštumi.

Diimmá čakčamánus lei das vuosttaščájálmas 73. filbmafestiválas Venezias.

Doppe vuittii filbma «Europa Cinemas Label» buoremus Eurohpá filbman ja kritihkarbálkkašumi «Fedeora» buoremus debutántarešissevran.

Tokyo riikkaidgaskasaš filbmafestiválas oaččui filbma maid bálkkašumiid.

Filmmas lea sullii 20 miljovnna ruvdnosaš bušeahtta.

Internašunála Sámi Filbmainstituhtta lea okta dain mii lea dorjon filmma 1,4 miljovnnain ruvnnuin.