Niilo Aikio noveallain muitaluvvo Deanuleagi ja Buolbmátjávrri báikkálašhistorjái ja árbedihtui gullevaš áššiin ja bargovugiin, maid boares olbmot dušše muitet.
Niilo Aikio noveallain muitaluvvo Deanuleagi ja Buolbmátjávrri báikkálašhistorjái ja árbedihtui gullevaš áššiin ja bargovugiin, maid boares olbmot dušše muitet.
Girjji noveallat muitalit nuorra gándda eallimis Buolbmatjávrri gilážis. Girječálli Niilo Aikio lea ieš Nigá láhkái vásihan mánná- ja nuorravuođaset Buolbmátjávrris, nuba girjji máidnasiin lohkki oažžu duohta gova vássán áigái ja diliide.
Ivdnás ja rikkis giella
Sámi kulturárbbi sirdin buolvvas nubbái lea dán girjji guovddáš ulbmil, man leat geahččalan ollašuhttit maid govaiguin. Niilo Aikio noveallain muitaluvvo Deanuleagi ja Buolbmátjávrri báikkálašhistorjái ja árbedihtui gullevaš áššiin ja bargovugiin, maid boares olbmot dušše muitet. Danin lea dehálaš, ahte áššit ja detáljat leat muitaluvvon riekta. Dát mihttomearri lea gáibidan čállis ja govvideaddjis čavga ovttasbarggu.
Ivdnás, rikkis gielainis Aikio lokte lohkki čalmmiid ovdii jáhkkemeahttun ja gelddolaš dáhpáhusaid. Bivdui ja šibitdollui gullevaš doaimmaid Aikio govvida dárkilvuođain ja áššedovdamušain.
Skábmaseavdnjadasas gitta gaskageasi ijahis idjii
Govvadáiddár Marketta Nilsena lea álo geasuhan sápmelačča máhttu heivehit iežas eallima ja birgejumi lundui, almma dálá olbmo mihtilmas bákku dušše geavahit buot alcces buorrin. Beaivválaš doaimmaid ja eallima eavttuid leat mearridan beaivváža ja mánu čuovgga meari molsašuddama. Nilsena govat mieđuštit máidnasiid miehtá jagi skábmaseavdnjadasas gitta gaskageasi ijahis idjii.
Govvida gánddaid eallima
Oahpahus barggustis Nilsen muitala máŋgii ohcan duššáš gáldomateriálaid, mat movttiidahttet Davvi-Suoma nuoraid, geat leat easkka oahpan lohkat. Eandalii gánddat leat dávjá duššástuvvan lohkamii, go eai gávdno girjjit mat muitalit sin iežaset máilmmis.
– Mun dihten, ahte máŋgasat sis beare vurde, ahte skuvlabeaivi nohká ja sii besset guollebivdui dahje meahccái ja duoddarii. Niilo Aikio Nigá-bánne bargguin ja buđaldusain muitaleaddji noveallat leat boahtán dego diŋgojuvvon deavdit dán guoros saji, Marketta Nilsen dadjá.
Almmustahttindoalut Anáris
Sámediggi almmustahttá davvi-, anáraš- ja nuortalašgielaide Niilo Aikio – Jávrri – Johan Niillasa – «Nigá 1» noveallačoakkáldaga, masa govaid lea ráhkadan Marketta Nilsen.
Anárašgillii noveallaid lea jorgalan anárašgiellameašttir, gudnedoavttir Matti Morottaja, ja nuortalašgillii fas sámedikki prošeaktabargi Raija Lehtola.
Sámegielat girjjiid almmuhandilálašvuohta dollojuvvo Anáris Sámekulturguovddáš Sajosis duorastaga 15.12.2016. Ohcejohkalaš nuorat lávlot, ja “Máinnasbottus” Irene Länsman ovdanbuktá Nigá -máidnasa.
