Åarjelhsaemien Teatere čájeha mánáid teáhterčájálmasa «Plupp - akte joejkespïele, en jojkikal» mas luohti lea guovddážis lunddolaččat. – Soaitá leat máilmmi vuosttaš juoiganspeallu, lohká čájálmasa buvttadeaddji Leammuid Biret Rávdná. GEAHČA VIDEO VUOLIMUSAS!
Åarjelhsaemien Teatere čájeha mánáid teáhterčájálmasa «Plupp - akte joejkespïele, en jojkikal» mas luohti lea guovddážis lunddolaččat. – Soaitá leat máilmmi vuosttaš juoiganspeallu, lohká čájálmasa buvttadeaddji Leammuid Biret Rávdná. GEAHČA VIDEO VUOLIMUSAS!
Åarjelhsaemien Teateres čájehit vuosttaš geardde iežaset teáhterčájálmasa «Plupp – akte joejkespïele, en jojkikal» Muoffies dán lávvardaga. Teáhterčájálmas lea máttasámegillii ja ruoŧa- ja dárogillii ja heivehuvvon mánáide.
– Gohčodat dan joejkespïele, go dán teáhterbihtás lea juoiganoassi čájálmasas ja gielas, iige dušše lávdečikŋan, čilge Åarjelhsaemien Teatere teáhterhoavda Cecilia Persson.
Son lea heivehan Inga Borg mánáidgirjji Plupp birra teáhterčájálmasa giehtačálusin. Buvttadeaddji Leammuid Biret Rávdná sii leat ožžon vuoigatvuođa Inga Borg bártnis Ante Grubbströmas gii fuolaha Inga Borg vuoigŋaduoji, ráhkadit teáhterčájálmasa ja sis lea buorre ovttasbargu suinna.
Johtigoahtá Mátta-Sámis
– Plupp lea binná bánna oaidnemeahttun hámáš mii ássá duoddaris ja buoremus skihpárat leat Luomeke ja Českije gii háliida borrat Luomeke. Muhto Plupp lea dieđihan Českijei ahte ii oaččo borrat Luomeke go Plupp lea mielde. Inga Borg lea dál 90 jagi ja lea čállán 24 girjji maidda mánát liikojit, muitala Cecilia Persson gii muitá Plupp hámi go čájehuvvui Ruoŧa TV:s tv-ráidun 1960-logus.
Gaskavahku lei Åarjelhsaemien Teatere bovden vuosttaš gitta njealját luohká dárogiel skuvlamánáid čájálmassii mii bisttii birrasii 45 minuhta.
– Geahččalančájálmas manai bures. Mánáid mielas ii lean máttasámegiella váttis áddet ja dat lei dehálamos midjiide diehtit.
Mánát muitaledje sii áddejedje ahte bihttá lei máttasámegillii, joatká buvttadeaddji Leammuid Biret Rávdná.
Son muitala Åarjelhsaemien Teatere ja Østra Norr teáhter Staares lea ovttasbargan ja ruhtadit čájálmasa EU-ruđaiguin.
Oahpan áddehahtti máttasámegiela
Teáhterčájálmasa neavttárat lea Hilde Stensland gii neaktá Plupp, kárášjohkalaš Marte Fjellheim Sarre gii neaktá Českije ja mázelaš Nils Rune Utsi gii neaktá Šlámma. Rešissevra lea Haukur Gunnarsson. Buohkat leat geasi oahppan máttasámegiela.
– Nils Rune Utsi ráppe ja lea hui somá gullat su ráppemin åarjelhsámegillii. Máttasámegiela oahpaheapmái lea biddjon olu návccat ja neavttárat leat geasi hárjehallan. Sii leat duođaid áŋgirit bargan gielain vai sáhttet neaktit máttasámegillii. Lea dehálaš ahte sii geat hállet máttasámegiela, áddejit maid neavttárat dadjet. Lea dehálaš ahte máttasámegiella gullo teáhteris, deattuha Leammuid Biret Rávdná.
Åarjelhsaemien Teatere fitná Plassjes 08.11, beaivvi maŋŋá Snoasas ja dasto Rauraviijkas ja dasto čájehuvvo Ruoŧas. Olles mátkelisttu gávdná asteatere.no neahttasiiddus.
Geahča oasáža čájálmasas dás. Dán lea Leammuid Biret Rávdná filbmen generálačájálmasas:
