-Almmuhus-
-Almmuhus-
-Almmuhus-
KULTUVRADavimus máisttut Norgga stuorámus biebmomeassuin

Davimus máisttut Norgga stuorámus biebmomeassuin

-

-

Norgga stuorimus biebmomeassut lágiduvvojit jahkásaččat, ja dán jagi lea festivála Oslo ráđđeviesu olggobealde čakčamánu 2.-4.beivviid.

Okta oassi Matstreif festiválas lea prošeakta «Davvi-Norga Matstreifii 2016» ja galgá addit vejolašvuođa Davvi-Norgga márkanastit našunála márkanis ja čájehit Davvi-Norgga biebmoguovlluid.

Báikkálaš biebmobuvttadeaddjit bohtet buot osiin; ábis, gáttis, mearas, duoddaris ja váris. Lea goalmmát jahki go Davvi-Norggas lea oktasaš gávpi, ja olbmot geat fitnet meassuin leat bures liikon Davvi-Norgga oktasaš gávpái.

 

Davvi-Norgga máisttut

Davvi-Norgga gávppis beasat giktaluvvot reahkkái, reabbái, meađđennjuvdosii, guollegáhkkui, suovastuhtton lussii, suovastuhtton dorskái, gáiccabirgui, sáltejuvvon goikebirgui, spiinnečoarbbeallái, Málatvuomi návrašii, buđehii, vuostái, márfái, biergoguhppárii, spihkejuvvon bohccobirgui ja ollu eará.

Gávcci fitnodaga galget beassat čájehit buktagiid, ja dat leat Kranes kjøkken Sállanis eret, Den Sorte Gryte Lodegiin eret, Lundal Nord Sálttus eret, Arctic Blue Suorttain, Tromspotet Sáččás, Arctic Mustard Bådådjos, H. Mydland Romssas eret, Lyngen reker Ittarvuonas eret.

 

Matstreif

Matstreif festivála lágiduvvo jahkásaččat ja dán jagi lea 12. geardde go meassut lágiduvvojit. Diibmá rehkenaste lágideaddjit ahte 200 000 guossi fitne meassuin gos badjel 200 fitnodaga fálle iežaset biepmuid. Mihttu lea boktit olbmuid beroštumi báikkálaš biepmuide ja addit olbmuide vejolašvuođa humadit biebmobuvttadeddjiiguin. Dieđut: Innovašuvdna Norga

Bohccobiergu maid  meassuin

Lassin oassálastet vel Finnmark Rein, Skodi Rein, Stensaas njuovahat ja Arctic Rein sierra prográmmas biebmomeassus mii gohčoduvvo «Boazu – duoddara sáŋgár».

Njunuš bohccobiergoambassadevrrat, Várjjatgoahkka Tor-Emil Sivertsen Várggáin eret ja Meyergårdengoahkka Svein Jæger Hansen Muoffis eret, čájeheaba bearjadaga beaivet movt galggat hirpmáhuhttit iežat olbmáid ja fulkkiid go ráhkadat borramuša bohccobierggus. Čájeheapmi lea lávddis Matstreif meassuin.

 

«Davvi-Norga Matstreif» lea ovttasbargu Innovašuvdna Norgga, golmma davimus fylkka fylkkasuohkana ja fylkkamánniid ovttasbargu. Norges Råfisklag lea maid mielde jođiheamis go biebmofitnodagat vulget oaivegávpogii giktalit olbmuid Norgga davimus máisttuin.

 

-Almmuhus-