Ráppár lohká ođđa bihttá heivet bures konsertii. Dán áššis sáhtát guldalit ođđa ráppa.
Ráppár lohká ođđa bihttá heivet bures konsertii. Dán áššis sáhtát guldalit ođđa ráppa.
Ráppár SlinCraze lea odne almmuhan ođđa šuoŋa man gohčoda «Dus lea». Musihkka lea movttet, muhto maiddái roavis.
– Dat lea dakkár somás dánsunšuokŋa mas lea veahá snoallan, muhto nu sáhttá leat muhtumin ráppas, čilge SlinCraze.
Suohtas stoahkat
SlinCraze váldoráppár lea mázelaš Nils Rune Utsi (24). Son fuomášuvvui maŋŋel go ráppegođii givssideami birra man gillái mánnávuođas, ja go gonagas Harald 70 jagi riegádanbeaivvis ráppii de beakkehii miehtá Norgga. SlinCraze lea ráhkadan olu ráppaid ja čuojahan konsearttaid, son lohká iežas liikot čállit maiddái ráppaid main ii leat nu duođalaš sisdoallu.
– Mun lean ráhkadan máŋga dánsunlávlaga ovdal, muhtumin lea suohtas stoahkat musihkain, čilge son.
Olbmot liikojit
Vaikke «Dus lea» ain varas, de leat olbmot jo muitalan SlinCrazii iežaset oaiviliid birra.
– Oallugat liikojit lávlagiid, muhtimat hirpmástuvvot go ii leat dábálaš ráppa, muitala son ja lohká dán heivet hui bures čuojahit konsearttain.
– Lávddi alde heive diet hui bures, dego mus maid eará dánsunlávlagat. Dat láve hui somá ja heive bures jus olbmuin lea buorre mokta, dadjá SlinCraze.
Ráppa vugiin čállá muitalusaid
Boahtte vahkkus čuojaha SlinCraze konseartta Malmös Ruoŧas, muđui eai leat sus plánat čuojahit olus dán geasi. Son lea baicce dán jagi vuoruhan ráhkadit šuoŋaid, ja son lea oaivegávpogis gávdnan booking- ja managementfitnodaga, doaivumis gullogoahtá de eanet boahtte jagi. Vaikke it gula su ráppaid geasi festiválain, de lea son dattege ráhkkaneamen Márkomennui.
– Suoidnemánus ovttasbarggan Inga Márjá Sarrin ja Sara Margrethe Oskalin (neavttárat, doaimmahus merken). Jus lean ipmirdan riekta, de galggan veahkkin čállit mánáide muitalusaid ráppa vugiin. Ovdanbuktin lea Márkomeanus, loahpaha Nils Rune Utsi.
Guldan «Dus lea»:
