Goranus-fitnodat lea almmuhan Áigi-girjeráiddu vuosttaš oasi «Fathoms of the Fenlake» eaŋgalasgillii, ja «Sami Myths» muitalusapplikašuvnna
Goranus-fitnodat lea almmuhan Áigi-girjeráiddu vuosttaš oasi «Fathoms of the Fenlake» eaŋgalasgillii, ja «Sami Myths» muitalusapplikašuvnna
Ante Aikio girjeráidu lea jorgaluvvon eaŋgalasgillii ja girjji sáhttá diŋgot suoma neahttagávppiin. Ante Aikio dadjá ulbmilin lea viiddidit vuovdima olgoriikkaide.
– Mii áigut oažžut Fenlake vuovdimassii Suoma turistaguovddážiidda gos leat eanemus eaŋgalasgielagat. Mii áigut maid almmustahttit dan e-girjin go dát formáhtta lea juo bivnnut olgoriikkain. Mii bargat oažžut ovttasbarggu almmuheddjiiguin olgoriikas, lohká Aikio.
Muitalus telefuvnnas
Goranus lea almmuhan maid «Sami Myths» -mobiilaapplikašuvnna mii lea buvttaduvvon ovttas Helssega fitnodagain Vidasoft:ain.
– Mii háliideimmet ráhkadit ođđaáigásaš bargoneavvu, mainna olbmot sáhttet oahpásmuvvat sámi mytologiijai. Mobiilaapplikašuvdna lea erenoamáš muitalanneavvu. Dan sáhttá álkit ođasmáhttit ja lea álki buvttadit ođđa sisdoalu, muitala Aikio. Applikašuvdna gávdno sihke AppStore:s ja Google Play:s.
