Sápmelaš filbmaproduseantta illuda go Davvi-Norgga musihkkavideo čájehuvvo Hollỷwoodas, dadjo ahte filbmafestivála sáhttá addit ođđa vejolašvuođaid filbmabargiide.
Sápmelaš filbmaproduseantta illuda go Davvi-Norgga musihkkavideo čájehuvvo Hollỷwoodas, dadjo ahte filbmafestivála sáhttá addit ođđa vejolašvuođaid filbmabargiide.
Divttasvuotnalaš Odd Levi Paulsen lea okta moatti sámi filbmaproduseanttain. Son illuda go su buvttaduvvon musihkkavideo lea válljejuvvon čájehuvvot filbmafestiválas Hollywoodas.
– Gáiddus niehku ollašuvvá. Munnje leamaš lunddolaš jurddašit ahte muhtin beaivvi soaittán olahit Hollywoodii go barggan filmmain. Eai mus leamaš makkár ge áigumušat, muhto dat leamaš beare suohtas ja movttiidahtti jurdda, čilge son.
Rahpá uvssaid
Lea Romssa joavkku Jadudah musihkkavideo «Red: Jadudah» mii lea válljejuvvon čájehuvvot «Dances With Films» filbmafestiválas.
Filbmafestivála lea beakkán ja dadjo ahte dát sáhttá leahkkut čeahpes filbmaproduseanttaid ja rešissevra vejolašvuođaid Hollywoodas.
– Fáhkkestaga lea uksa goavkkil, ja dalle ferte oaidnit makkár vejolašvuođaid dat addá. Filbmasuorggis lea fierpmádat hui dehálaš. Jus leat rievttes báikkis rievttes áigái, de sáhttá oahpásmuvvat rievttes olbmuiguin. Jus vuolggán Hollywoodii, de dieđusge sávan ahte oahpásmuvan olbmuiguin geat sáhttet veahkehit viidáset karriearas, lohká Paulsen gii áigu ohcat mátkkedoarjagiid vai beasašii mátkkoštit USA:i.
Govven: Nadia Frantsen
Nuppi filmmain Hollywoodii
Musihkkavideo «Red: Jadudah» gudnijahttá náittosdili, ja čájeha vuoras pára eallima náittosdilis. Filmma lea oslolaš Maida Hals rešisseren.
Son ássá Hámmárfeasttas ja lea diibmá maid olahan Davvi-Norgalaš musihkkavideon Hollywoodii. Dalle lei ráhkadan filmma Hábmira nieidda Eline Torp lávlagii «Violence Done Well».
– Lea stuora mearkkašupmi go dohkkehit mu barggu, čevllohalan ja illudan go nuppes beasan musihkkavideoin Hollywoodii, dadjá Hals preassadieđáhusas.
Filbmaproduseanta rámida bargoskihpáris ja muitala sus erenomáš čehppodaga.
– Leamaš erenomáš suohtas suinna ovttasbargat. Sus leat áigumušat ja lean viehka olu oahppan dán ovttasbarggus, lohká Odd Levi Paulsen.
Sámi filmmat miehtebiekkas
Musihkkavideo mii čájehuvvo filbmafestiválas Hollywoodas dán mánu loahpas čájehuvvui vuosttaš gearddi Tromssa Internašunála Filbma Festiválas (TIFF).
Divttasvuotnalaš muitala ahte sus ledje oktiibuot njeallje filmma TIFF:s dán jagi, son lei buvttadan golbma «7 Sámi stories» filmmain mat maŋŋel leat čájehuvvon maiddái olgoriikka filbmafestiválain.
– Mun jáhkkán ahte ilbmet vel eambbo sámi filmmat ovddasguvlui, dál oaidnigoahtit Sámi Filbmainstituhta bohtosiid. Jáhkkán maiddái ahte máilmmis lea beroštupmi sámi filbmii, mii han oaidnit man bures Disney-filbma «Frozen» lea lihkostuvvan. Das leat sámi elemeanttat ja olbmot čájehit beroštumi min kultuvrii. Lea váttis vástidit lihkostuvašii go muhtin sápmelaš filbmadahkki Hollywoodas, muhto jus olmmoš duođai háliida ja bargá dan nammii, de lea buot vejolaš, loahpaha Paulsen.
Govven: Nadia Frantsen
