-Almmuhus-
KULTUVRA– Ieža ean ipmirdan ahte lea vuoitán

– Ieža ean ipmirdan ahte lea vuoitán

-

-

Jon Mika Nystad Eskonsipo (11) vuittii bearjadaga miessemánu 8. beaivvi gehččiidbálkkašumi mánáidfilbmafestiválas Budapestas Ungáras. Dás oainnát filmma:

Jon Mika (11) vázzá 6. ceahkis Báhpajávrri skuvlla sámeluohkás Romssas. Son ráhkada legofilmmaid ja bidjá daid Youtube-neahttabáikái.

 

Su filmmaid leat geahččan lagabui 2 miljovnna geardde ja su Legofilbmakanála čuvvot badjelaš 2000 olbmo.

Gieskat sáddiiga Jon Mika ja su eadni Berit Nystad Eskonsipa filmma «Lego Mega Robot» Ungára Kid´s Eye Filmefestivalii, mii lea mánáidfilbmafestivála. Filbma válljejuvvui mielde, ja vuittiige maid gehččiidbálkkašumi.

– Go juohkigohte bálkkašumiid de hálle aivve ungáragiela, nu ean ipmirdan ahte lea vuoitán. Go čurvo Jon Mika nama ja sevve munno lávddi ala de fertiime jearrat mii dat lea, ja de muitaledje ahte son lea vuoitán ovtta daid deháleamis bálkkašumiid dán festivála, muitala eadneolmmoš Berit.

 

10-jahkásažžan álggii

Jon Mika ráhkadii vuosttaš filmma skábmamánus 2013, moadde beaivvi ovdal go devddii 10 jagi. Son liiko legoide ja lávii geahččat YouTubas dakkár filmmaid maid earát leat ráhkadan.

 – De háliidii ieš geahččalit, ja moai su áhčiin, veahkeheimme su redigeret ja nu ain.

Das rájes osttiiga váhnenguovttos kamera ja eará rusttegiid gándii.

 – Dál son gal dahká visot ieš, pláne, čálle dialogaid, filbme ja čuohppá ieš. Lea hui somá oaidnit mo lea ovdánan dan rájes go álggos ráhkadišgođii filmmaid.

 

Jon Mika áhčči ges lea jietnaneavttár filmmain. Jon Mikas lea juoga man gohčodit «selektiv mutisma», dat mearkkaša ahte son ii huma earágo lagamus olbmuiguin, danne ii bija jienaid dahje huma ieš filmmaide.

 – Áhčešguovttos liikoba fárrolaga bargat, ja moai dorjo su nu bures go sáhtte.

Dát filbma čájehuvvui ges Amandusfestiválas njukčamánus:

 

 

Miehtá máilmmi geahččit

Legofilmmaiguin lea Jon Mika measta olahan viidát go sámi filbmadahkkit. 1.8 miljovnna olbmo leat oaidnán su filmmaid, ja geahččit leat miehtá máilmmi.

 – Muhto olusat liikojit legoide, ságastallan filmmain lea eaŋgalasgillii. Dasa lassin lea interneahtas nu ahte lea álki olahit olbmuide, dadjá eadneolmmoš dasa.

 

Muhto ii son leat dušše YouTube bokte čájehan filmmaidis. Njukčamánus čájehuvvoi maid su filbma «Lego Pim in Swimming Pool» Amandusfestiválas Lillehammeris.

– Dan maŋŋil oinniimet maid ahte oaččui eanet norggabeale gehččiid YouTubas, muitala Berit Nystad Eskonsipo.

 

Ihttá báberáviissa beasat lohkat mátkereivve man Biret ja Jon Mika leaba čállán iežaska mátkis Budapestas Ungáras.

-Almmuhus-