-Almmuhus-
-Almmuhus-
-Almmuhus-
KULTUVRASámi symbolat Nidarosdomen áltárii

Sámi symbolat Nidarosdomen áltárii

-

-

Máttasápmelaččat leat dáhton iežaset duopmogirku čalmmustahttit maiddái sámevuođa. Dan oktavuođas lágiduvvui gilvu, ja dál lea čielgan ahte sápmelaš dáiddár Folke Fjällström beassá čiŋahit Nidarosdomena ođđa áltára.

Folke Fjällström (74) lea beahkkán sámi dáiddár Ruoŧas. Bijje Spädtja, dahje Vålådalen Jämtlánddas lea su ruovttubáiki. Son lea mátta-sápmelaš gii duddjo ja ráhkada skulptuvrraid. Sus ii leat makkár ge čanastupmi Nidarosdomenii, muhto illuda sakka čiŋahit Troandima duopmogirku áltára.

 – Lea hirbmat suohtas go válljejuvvojin dán bargui, lea gelddolaš ja illudan dása, lohká Fjällström.

 

Heive Nidarosdomenii

Nidarosdomen lea máttasápmelaččaid duopmogirku, ja lei ge máttasámi searvegotteráđđi mii áŋgiruššagođii oččodit sámi symbolihka girkui. Dan oktavuođas lea lágiduvvon dáiddárgilvu masa čiežas serve. Jury lea válljen Folke Fjällström vuoitin, ja son lea árvalan čiŋahit áltára Jesus govain ja dasa heivehit mátta-sámi symbolaid.

 – Dál lean galledan Nidarosdomen, ja mun jáhkkán ahte mu dáidda heive deike. Mu mielas lea erenomáš buorre go Nidarosdomen dáhtu čalmmustahttit sámevuođa, dat illudahttá mu sakka, lohká dáiddár.

 

Dá lea dáiddára evttohus mo háliida čiŋahit Nidarosdomena ođđa áltára.

 

 

Jury cealkámuš

Go jury árvvoštalai evttohusaid, de eai diehtán geat leat searvan gilvui. Sii válljejedje Folke Fjällström vuoitin earret eará go liikojit dáidaga hámi ja dáiddára áigumuša čiŋahit áltára luondduávdnasiiguin. Jury mielas lea maiddái dát dáidda gelddolaš Nidarosdomen eará čiŋaid ja dáidaga ektui.

Jury

 

Steinar Bjerkestrand, jury ovdaolmmoš ja Nidaros duopmogirku ođastusa direktevra

Maja Dunfjeld, Dr.phil. Ovddasta máttasámi searvegotti

Aina D. Stenfjeld, dáiddár. Ovddasta máttasámi searvegotti

Tore Johnsen, Sámi girkoráđi generálačálli

Marie Louise Anker, Nidaros duopmogirku ođastusa ossodatjođiheaddji

­ – Jury oaivvilda ahte dát evttohus sáhttá mearkkašit báiki gos heive jurddašallat ja mediteret, seammás heive dát Ipmilbálvalusbáikin, čállá jury gii dáhtu gulahallat dáiddárin ovdal bargu álggahuvvo. Sii dáhtot čielggadit galgá go Jesus guovdu áltára, gokko áltára sadji galgá girkus ja man stuoris dát galgá.

 

Gelddolaš evttohusat

Máttasámi searvegotteráđđi, Nidarosa bisma ja Nidaros duopmogirku ođastus leat lágidan gilvvu masa Folke Fjällström, Birgitta Ricklund, Bendik Selfjord Eriksen, Hilde Schanke Pedersen, Ellen Sara Reiten Bientie, Ingunn Utsi ja Mathis Nango serve.

 – Ledje čieža gelddolaš ja buori evttohusa. Mii válljiimet dan mii min mielas lei buoremus. Eat mii diehtán gii dán lei hábmen ovdal go rabaimet konvoluhta mas čuoččui namma. Folke Fjällström lea beahkkán dáiddár Ruoŧas ja son leamaš mielde odne ávvudeamen go vuittii gilvvu, muitala jury ovdaolmmoš ja Nidaros duopmogirku ođastusa direktevra Steinar Bjerkestrand.

 

100 jagi ávvudeapmái

Guovvamánu 6. beaivvi 2017:s ávvudit Troandimis ahte leat vássán 100 jagi dan rájes go máttasápmelaš Elsa Laula Renberg čohkkii sápmelaččaid vuosttaš riikkačoahkkimii. Dán ávvudeapmái galgá ođđa áltár gárvvisin.

 – Nidaros duopmogirkui eai láve dábálaččat háhkat ođđa ja bistevaš áltárčiŋaid, muhto dán vuoru spiehkastit go Nidarosdomen lea máttasámiid duopmogirku, dolin lei maiddái Nidarosdomen guhkit áigge badjel duopmogirkun buot sámiide Norggas. Leamaš guhkit áigge sávaldat čalmmustahttit sámevuođa girkus, čállá Nidaros duopmogirku ođastus preassadieđáhusas.

-Almmuhus-