-Almmuhus-
-Almmuhus-
-Almmuhus-
KULTUVRARuoššas sensurerejuvvon

Ruoššas sensurerejuvvon

-

-

Murmánskka dáiddamusea biehttalii čájeheames dán dáidaga. Ieš dáiddár lohká belohahkii áddet sin mearrádusa.

Máret Ánne Sara govva «Moder Jord» galggai otná rájes čájehuvvot Murmánskka guovlulaš dáiddamuseas, muhto nu ii šaddan.

– Musea dieđihii vahkku áigi ahte eai čájet buot dáidagiid mat gullet min čájáhussii, muitala Sara.

 

Erenoamáš dovdu

Dáiddajoavku FUFF rahppui odne čájhus Murmánskka dáiddamuseas. Čájáhussii gullet 4 dáidaga maid Sara lea ráhkadan, muhto musea lea mearridan ahte eai čájet ovtta dain.

– Álggos áigo eanet dáidagiid biehttalit čájeheamis, muhto de mearridedje loahpas ahte dušše dán gova sensurerejit. Daidá leat álásvuohta mii dagahii ahte eai hálit čájehit dan. Mun in leat ožžon makkár ge čilgehusa museas, muitala dáiddár, guhte lohká iežas vuosttaš geardde vásihan sensura.

– Hui erenoamáš dovdu sensurerejuvvot, lohká son.

 

Árvvoštalai geassádit

Sara lohká iežas árvvoštallan geassádit olles čájáhusas.

– Muhto gávnnahin ahte soaitá eanet ávki searvat dasa go geassádit ja baicce humoristtalaččat čalmmustahttit sensura, muitala son.

Ieš lohká belohahkii áddet musea mearrádusa.

– Ruoššas ii leat seammalágan cealkinfriddjavuohta go mis Norggas. Doppe eai soaitte nu duostilat provoserejeaddji dáidaga ovdanbuktit, jurddaša son ja čujuha earret eará dasa mo «Pussy Riot» joavku meannuduvvui Ruoššas.

 


«MODER JORD»: Dákkár dat lea dat govva man Murmánskka guovlulaš dáiddamusea biehttala čájeheames.
Govva: Máret Ánne Sara

Jáhkká kulturerohusaid maid váikkuhan

Son jáhkká maiddá kulturerohusaid leat duogážin dasa go su govva ii čájehuvvo.

– Ruoššas lea eanet konservatiiva servodat go dáppe. Sámi servodat lea maid veahá eanet konservatiiva go stuorraservodat, nu ahte mun ipmirdan muhtin muddui sin mearrádusá. Jurddašan seammás ahte sii eai sáhte álgit vuhtiiváldit gussiid dábiid, fertet baicce mii dohkkehit ahte nie lea doppe vaikke midjiide lea imaš, čilge son.

Máret Ánne Sara muitala iežas johttán riikain gos lea vásihan almmolaš ráddjemiid ja namuha earret eará Ruošša ja Kiinná gos gildet ja raddjejit dieđuid boahtimis almmolašvuhtii. Kiinnás ovdamearkka dihte ii gávdno google ja facebook.

– Friddjavuohta lea guovddážin dáiddabárggus. Dan hagá jápmá dáidaga vuoigŋa. Seammás dieđusge dákkár ráddjen geafiduhttá gehččiid vásáhusá ja nu maid dáidaga ulbmila.

 

Gárvvohan

Dál lea dáiddár ráhkadan ođđa «Moder Jord» gova, dás lea gárvvohan nissona.

– Diet lea mus dakkár humoristtalaš kommentára dán dáhpáhussii, čaibmá ieš.

-Almmuhus-