Norgga áidna suorbmagiela ámmátteáhter, mii čájeha gielahis bihtáid maid buohkat ipmirdit, lea fargga Guovdageainnus.
Beaivváš Sámi našunálateáhter fuomášuhttá preassadieđáhusain ahte Teater Manu, iežaset mágihkalaš gielain, fitnet Beaivváža ja Guovdageainnu guossis dán mánu 20. beaivvi.
Sis leat oppamáilmmálaš ja gielahis bihtát maid buohkat, beroškeahttá giellamáhtu, besset návddašit. Rem & Ron- bihttá čájehuvvo skuvllain, institušuvnnain ja bealjehemiid servviin miehtá riikka, lullin Kristiansandas gitta davvin Guovdageainnus, ja maiddái Romssas.
Gierdevašvuohta
Teáhterbihtá sisdoalu birra čállet ahte Remas ja Ronas lea guovttelágaš luondu ja iešláhki, ja dego áđđestallaba Helana ja Halvana. Ron ii leat nu árjjalaš, muhto son lea oaivámuš sudnos, ja Rem lea njáiggos- ja jaskeslunddot. Soai leabba govvajournalistat geat mátkkošteaba miehtá riikka govvendihti iešguđetlágaš dáhpáhusaid.
Soai geavaheaba ollu áiggi mátkkoštemiide, ja dat mielddisbuktá ollu vuordimiid. Ja go vuordit šaddá, de ferte maid leahkit gierdevaš. Muhto dađibahábut ii gávdno gierdevašvuohta. Sudno mátkkošteamit leat ovtta ládje áiccadeapmi. Soai fuobmába iežaska čanastumiid goabbat guoibmáseaskka.
Buohkat galget ipmirdit
Dán mánáid- ja bearaščájálmasas geavahuvvo magihkalaš giella maid buohkat ipmirdit. Rem & Ron geavaheaba suohtastallan hámi bihtás iežaska earenoamáš vuogi mielde.
– Mii rámidit skuvllaid mat čájehit čájálmasa buohkaide, ii ge dušše daidda ohppiide geat leat bealjeheamit, čállá Teater Manu, mii lea Norgga áidna suorbmagiela ámmátteáhter.
