Bearjadaga oainnát Guovdageainnu nieidda Annbjørg Hætta fas lávlungilvvus The Voice. Dán háve lávluba guovttes ain fárrolaga, ja dušše nubbi beassá viidáseappot.
The Voice lávlungilvvus TV2:s lea bearjadaga duellat. Mentorat leat bidjan guoktása ain fárrolaga lávlut, ja besset dušše nuppi sudnos váldit ain viidáseappot. Annbjørg (34) ja Fredrikstad nieida Oda (18) leaba vuosttažat geat galgaba lávdái bearjadaga. Sudno mentor Hanne Sørvåg lea válljen Alanis Morisettes lávlaga “Hand in my Pocket” mainna galgaba gilvalit nubbi nuppiin.
Oahpes lávlla
Dát gilvu lea báddejuvvon juo guovvamánus, ja vuosttaš lávlla mainna Annbjørg beasai viidáseappot, lei su iežas lávlla sámegillii “Mun dárbbašan du”. Buot oasit mat leat ovdal njuolggosáddaga miessemánu 15 beaivvi, báddejuvvojit ovdagihtii.
Ii Annbjørg dieđusge muital movt manai suinna gilvvus, muhto lohká dán leat stuora vásáhussan. Ja lei erenoamáš suohtas lávlut juste dan lávlaga, “Hand in my Pocket”, man bearjadaga prográmmas lávluba Odain.
– Lei hui somá, go lea lávlla man lean ieš “diggen” dalle go CD bođii, go ledjen 15 jahkásaš. Dat lei okta dain vuosttaš cd:in maid lean oastán. Dan dáfus ledjen hui oadjebas dan lávlut ja šattai álkit hárjehallat maid go lei oahpes lávlla, dadjá Annbjørg.
Álki ovttasbargat
Son lohká leamaš hui gealdagasas gullat geainna galggai lávlut fárrolaga, ja lohká Odain lei hui álki ovttasbargat
– Nu lea goit Hanne geahččalan bidjat oktii daid iešguđet čehppodagaid, ja geat heivejit lávlut ovttas. In dieđe gal mearrida go ahki maidege, vaikko munnos lei oalle erohus dakko. Doppe lei eará párra geat leigga 32 ja 58. Dál mun illudan oaidnit dán prográmmas daid earáid geaid son lea maid bidjan oktii, dadjá Annbjørg.
Duhtavaš
Son lohká iežas mentora Hanne leat buorre mentorin.
– Son lea dakkár olmmoš gii diehtá maid son háliida, ja son astá maid gullat jus leat evttohusat. Son váldá daid vuhtii. Moai maid oaččuime buori responsa gehččiin geat ledje studios, ja dat addá buori dovddu. Sávvamis lea liikká stuora beroštupmi sis geat čohkkájit ja gehččet TV, go loahpaloahpas leat sii geat mearridit gii vuoitá, dadjá Annbjørg.
The Voice gilvvus dán vahkkoloahpa ii beasa mentor eambbo nuppi válljet viidáseappot, muhto njuolggadus lea maid nu ahte dat eará mentorat sáhttet oktii juohke prográmmas suoládit lávlu iežas jovkui.
