«Máret» duo almmuheaba vuosttaš cd-skearru olgoriikkas, ja Cubas čuojaheaba dan vuosttaš geardde.
«Máret» duo almmuheaba vuosttaš cd-skearru olgoriikkas, ja Cubas čuojaheaba dan vuosttaš geardde.
«Máret» duo masa Klemet Anders Buljo ja Marit Hætta Øverli gullaba, almmuheaba iežaska ođđa cd-skearru «Alo» olgoriikkas miessemánu 4. beaivvi. Dan ovdanbuktiba vuosttaš geardde guldaleddjiide Cubas, gos turnereba miessemánus.
– Ulbmil lea čađat leamaš ahte almmuhit dán skearru olgoriikkas. Skearru lei gárvvis diibmá geasset jo, muhto de háliideimmet vuordit dassái go ođđa márkanat leat gergosat dasa, čilge Klemet Anders Buljo guhte čuojaha duos.
Son lohká Lulli-Amerihká leat vuosttaš «ođđa márkanin» mii lei gearggus vuostáiváldit sudno.
Searvamin árbevirolaš festiválii
Váldoulbmil sudno turneas lea oassálastit jahkásaš árbevirolaš «Romerias de Mayo» kulturfestiválas mii lágiduvvo Holguín provinssas Cubas. Festiválas leat ruohttasat jo 1790-logus go nuorra dáiddárat mearridedje lágidit vázzima Loma de la Kors čohkkii ávvudan dihte go giđđa lea boahtán. Dan rájes leat Holguín olbmot ávvudan dán beaivvi iešguđet ládje, measta dego Guovdageainnu beassášfestivála. Festiválas čuojahit miehtá máilmmi artisttat ja doppe leat maid eará čájálmasat. Jahkásaččat galledit duháhiid mielde cubánárat ja olgoriikkalaččat festivála.
– Moai ledne Cubas guokte vahkku muhto ean astta gal luomostállat, lassin čuojahemiide galge maid deaivvadit kulturolbmuiguin ja álgoálbmotovddasteddjiiguin, čilge Buljo guhte illuda Cubai vuolgit.
Illudeaba vásihit Cuba
Cuba lea leamaš «gitta» riika maŋimuš 57 jagi, liikká lea riikka dovddus kulturmetropola gos muhtin máilmmi čeahpimus musihkkárat ja dánsejeaddjit leat vuolgán. Dát leage mii geasuha Buljo ja «Máret» duo Cubai.
– Moai háliidetne vásihit dán riikka dan bále go lea ain oalle gitta ja ovdal go olu turisttat johtigohtet doppe. Doppe lea sierra kultuvra ja háliidetne vásihit dan ovdal go riikka rahpasa eanet ja dát kultuvra báidno oarje-máilmmi kultuvrii beare sákka, čilge son.
Vuolábealde ášši beasat gullat oasážiid ođđa skearrus.
– Sáhttá leat historjjálaš
Eai goassege ovdal leat sámi artisttat doallan konseartta Cubas, ja Audioland ja festiválalágideaddjit leat máŋga mánu ráhkkanan dása.
«Máret» duo lea rámis go beassá leat vuosttaš sámi musihkkaambassadevran ja rahpat uvssaid eará kulturgaskkusteddjiide kulturlonohallama dáfus Lulli-Amerihkká riikkaide.
– Dát sáhttá leat historjjálaš dáhpáhus mii váikkuha internašunála promoteremii ja sámi musihka ja dáiddáriid eksporteremii olgoriikkaide, čállá Audioland prošeaktajođiheaddji Olga Solyanik preassadieđáhusas.
Čalmmustahttiba maid eará sámemusihkkariid
«Máret duo managerat leat bargamin almmuhit skearru maiddái Norggas ja almmuhit dáhtona nu jođánit go dat leat čielggaduvvon.
Dasa lassin galgá duos turnea maiddái Máttá-Norggas boahtte čavčča, ja geahččalit maiddái almmuhit duo Japanas loahpageahčen jagi. Klemet Anders Buljo ieš lohká leat guovttegeardánis ášši go olgoriikkas beassaba almmuhit skearru.
– Munno musihkas lea luohti ja sámemusihkka vuođđun ja de livččii varra lunddolaš dáppe almmuhit skearru álggus, seammás dovde ahte lea áigi lávket dobbelii ja maiddái gállit luotta eará sámeartisttaide, dadjá Buljo ja muitala iežaska áigut olgoriikkain maid gaskkustit eará sámemusihka.
– Moai áigo doppe čalmmustahttit maiddái eará artisttaid ja muitalit sin birra. Mun jáhkán ahte jus sámemusihkkárat ovddastat guđet-guoibmámet de mii olahat guhkelii.
