Go Musihkkafestivála buvttadeaddji čurvii Isac Elliot nama, de ribahedje muhtun nieiddat illugatnjaliid golggihit.
– Oh lea somá, lohket nuoraidskuvlla nieiddažat measta oktiinjálmmiid.
GEAHČA VIDEO:
10-luohká nieida ii hálit ieža nama almmuhit, muhto muitala čieručalmmiid Ávvirii ahte dat gal lei nu somás ođas ahte ribahii gatnjaliid golggihit.
– Šaddá goalmmát geardde go beasan Isac Elliot konsertii, lohká 10. luohká nieida ja sihkku illugatnjaliid.
Somá
Vaikko buohkat eai leat seamma stuora fansat, de illudit sii maid go Isac Elliot boahtá Guovdageidnui:
– Hui suohtas, vaikko in leat hui stuora fana Isac Elliot, de láven muhtumin gullat su musihka ja da lea fiinna musihkka, lohká 9. luohká oahppi Máret Julianne. Seamma oaivilis lea 15-jahkásaš Lise Victoria:
– Hui suohtas gullat, ja earenoamážiid sutnje min luohkás gii álggii čierrut go gulai ahte Isac Elliot boahtá.
– Bohtet olu olbmot
9.luohká nieida Inger Elin Hætta Tornensis ges illuda go Guovdageidnui maid bohtet ná stuora násttit:
– Go ná stuora artistta boahtá, de bohte maid sihkkarit olu olbmot Guovdageidnui, ja sii besset oaidnit man fiinnis Guovdageainnus lea, ja ahte mii maid oažžut stuora násttiid deike.
Nuoraidskuvlla nieiddažat eai loga gal iežaset dál vuos heŋgot Isac Elliot plakáhtaid oađđenlanja seaidnái, muhto gii diehtá maŋŋel konseartta.
Eai dušše nieiddažat geat illudit. Maiddái lunttaid mielas lea somá go ná stuora násti boahtá Guovdageidnui:
– Oba somá! Mii skuvllas liikot buohkat Isac Elliot musihkkii, deattuha 10. luohká bárdni vel Ávvirii.
Geahča video go Guovdageainnu nuoraidskuvlla nieidda lávllestit ovtta Isac Elliot lávlaga:
