Almmuhus

Almmuhus

Háliida gáktenjuolggadusaid

Duojár, Áilen Nigá Elle Máret, oaivvilda ahte berre ásahit gáktenjuolggadusaid vai gákti ii šat earáhuvašii. Su soardá oaidnit go Kárášjoga gákti earáhuvvo ja seaguhuvvo eará guovllu gávttiiguin. Govven: Kila Anti

Kárášjoga gávtti ođasmahttin ja rievdadeapmi soardá duojára Áilen Nigá Elle Máreha, dál dáhtu dán bissehit. – Lea áigi ásahit gáktenjuolggadusaid. Eat sáhte diktit ná leavvat, loahpas eat dieđe mii mis lea badjelis, lohká son.

Almmuhuvvuon: 
Maŋŋebárga, 31 Njukčamánu, 2015 - 15:14
Ođastuvvon: 
Ođastuvvon: 22.12.2015 - 13:46
Fáddásánit: 

Odne ságastalle BeassiFestiválas Kárášjoga gávtti birra. Kárášjohkalaš duojár Áilen Nigá Elle Máret, Ellen Marit N. Eira, lea bargan duodjeoahpaheaddjin 30 jagi. Sus lei sáhkavuorru semináras ja muitalii Kárášjoga gárvodanárbevieruid birra ovdalis dássážii.

 

Earáhuhttin soardá

Kárášjoga gákti lea earáhuvvon ja ođasmahttojuvvon. Áilen Nigá Elle Máret muitalii sáhkavuorustis ahte Kárášjoga gáktegeavaheamis gávdnojit olu čálekeahtes njuolggadusat ja ahte daid berre viidáset fievrridit.

 – Gákti muitala guđe guvlui olbmot gullet, muhto dál šaddá olmmoš eahpesihkkar. Mii geat leat oahppan iežamet váhnemiin gávtti birra ja leat atnán gávtti unnivuođa rájes, mii soardašuvvat. Midjiide šaddá unohisvuohta, lohká duojár.

 

Sulastahttá eará guovllu gávttiid

Kárášjoga almmáiolbmogávttis leat ovdamearkkadihti álgán hárdodiliid birra goarrut liige báttiid ja oalgebihtáide bidjet maid diliid. Nissonolbmogáktái ges leat ovdamearkkadihti holbeláđđái goarrugoahtán njunnesuorraniid ja holbi sáhttá sulastahttit álggahuvvon Guovdageainnu holbbi.

 – Kárášjoga gákti muittuha mu eará guovllu gávttiid. Mus lea ávžžuhus kárášjohkalaččaide, állet šat curbmá. Eat galgga bilidit iežamet gávtti ja seaguhit eará guovllu gávttiid hámiiguin, dadjá Áilen Nigá Elle Máret.

 

Fertejit cuiggodeami gierdat

Gákti sáhttá rievdan danin go nuorat olbmot johtet olu ja dákko bokte fuomášit ođđa trendaid maid heivehit iežaset gáktái, jáhkká duojár. Dasa lassin dadjá son ahte eará guovllu olbmot, geat galget geavahišgoahtit Kárášjoga gávtti, soitet dovdat gávtti amasin ja ahte ii oro gullamin sutnje.

 – Son guhte earáhuhttá gávtti, ferte gierdat cuiggodeami. Dáčča maid johtá olu, muhto Nordlándalaš ii seagut iežas bunáda eará guovllu bunádain go sis leat njuolggadusat, logai son semináras.

 


Kárášjoga liidnegávttid ja láđđegávttit.
Govven: Kila Anti

Gáktenjuolggadusat

Áilen Nigá Elle Máret dáhtu bissehit gávtti earáhuhttima ja lohká dál áigin ásahit gáktenjuolggadusaid.

 – Lea áigi ásahit gáktenjuolggadusaid. Eat sáhte diktit leavvat ná, loahpas eat dieđe mii mis lea badjelis. Dat gal lea mu sávaldat, lohká son ja joatká.

 – Manin eat galgga doalahit iežamet vieruid, mii lea sivaid go eat sáhte šat dahkat nu go ovdal? Dat doaibmá bures anus nu go ovdal ge, lohká Elle Máret.

 

Eará vuogit

Ii leat dušše gáktemálli mii rievdá, muhto maiddái gáktegeavaheami vierut. Earret eará lea kárášjohkalaš geavahišgoahtán stuora dihpiid mat bisánit aldasa ala, kárášjohkalaš lea lebbegoahtán liinni ja gahpirbáttit čadnojuvvojit duogábeallái nu go dolin dahke gohkkedettiin. Áilen Nigá Elle Máret rávve eará vugiide dorvvastit jus gákti ii leat vuogas.

 – Jus olmmoš lea raddái, de heivejit guhkes riesaldagat, oanehit riesaldagat heivejit guhkes seakka olbmuide. Jus juolggit leat seakki, de sáhttá goaruhit suohkadat gálssohiid ja jus olmmoš lea unni ja jorbbas, de ii galgga gákti nu healbmái, rávve duojár,

Ovdasiiddus dál