Ávvir bivdá vuot lohkkiid evttohit dán jagáš sápmelačča.
Golmma háve lea Ávvir nammadan jagi sápmelačča. Dál galgá njealját háve nammaduvvot, ja de bivdit fas veahki lohkkiin.
Sápmelaš galgá bargan buori barggu sámeservodaga hárrái, ja soaitá beaggán medias vel.
Evttot namaid
Lea go beaggán? Ollašuhtten juoidá? Rahčan juoga man nu dihte? Dahje eará ákkat? Dál bivdit lohkkiid evttohit gii «dán jagá sápmelaš» namahusa galgá guoddit.
Dán jagáš sápmelaš galgá beaggán miehtá Sámi, ja áinnas vel viidábut. Sápmelaš galgá bargan buori barggu sámeservodaga ovdii, ja soaitá beaggán mediain iežas barggu dahje rahčamuša oktavuođas.
Bivdit evttohusa sáddet Ávvirii, mas muitalat manne juste dat olmmoš ánssáša namahusa. Áigemearri sáddet evttohusa lea skábmamánu 30. beaivvi. Evttohusa čálistat juogo Instagram bokte midjiide: avviraviisa, Facebook messengera bokte: Ávvir, dahje sáddestat dán epoastačujuhussii: redaksjonen@avvir.no.
Juovlamánu 3. beaivvi almmuhat geat leat evttohasat nammaduvvot dán jagi sápmelažžan, ja dan rájes besset lohkkit jienastit su gean oaivvildit galgat vuoitit.
Vuosttaš vuoiti lei artista
Jahki lei 2015 go Ávvir nammadii dán jagáš sápmelačča vuosttaš háve. Dalle šattai lullisápmelaš Jon Henrik Fjällgren dan jagi sápmelažžan.
Son ovddidii luođi ja erenoamážit Lulli-Sámi luohtevieruid. Lei mielde Ruoŧa Melodifestivalenis, ja goasii beasai Eurovision musihkkagilvui.
Čuvgehii rohcošemiid Divttasvuonas
6373 jienas manai bealli Marion Anne Knutsenii.
– Dihten ahte ledjen nammaduvvon, muhto in lean goassege jáhkkán ahte vuoittán! Lea stuora dáhpáhus, ja mun anán dan hui árvvus, dajai Knutsen Ávvirii go vuittii.
Divttasvuotnalaš bekkii jagi 2016 olu, go son čuvgehii rohcošemiid Divttasvuonas, mat galget jahkeviissaid dáhpáhuvvan.
Šattai ovttaládje ovdagovvan dan áššis, go rahpasit muitalii maid ieš lei vásihan gilážis.
Čalmmustahtii ášši man olbmot čuvvot
16 evttohasas oaččui badjeolmmoš Jovsset Ánte Sara liigeeanemus jienaid, 39 proseantta jienain. Vaikko ieš dalle válljii jienastit oappás, Maret Anne Sara, de lei sutnje hui suohtas go šattai dan jagáš sápmelažžan.
Sara bekkii 2017:s go lea vuosttaš ja áidna badjelolmmoš gii lea stevdnen stáhta unnidangáibádusa dihtii Finnmárkkus.
