Ávvir lea logi jagi dán jagi – ja min mielas ánssáša aviisa luođi. Ihttin lea maŋemuš beaivi go luohtebiddjit sáhttet sáddet luođi midjiide, ja leat mielde gilvvus vuoitit 10 000 ruvnno. Odne doallá luohteberošteaddji Åsa Márgget Anti nuvttá juoigankurssa, masa son bovde buohkaid searvat.
Luohteberošteaddji Åse Márgget Anti lea ráhkadan Facebookas siiddu, «Juoiganmokta», gos son áigu oahpahišgoahtit olbmuid juoigat.
Ávvira luohtegilvvu oktavuođas son doallá odne eahkedis, diibmu 20:00, juoigankurssa buohkaide geat háliidit – gos sii ovttas ráhkadit luođi Ávvirii ja servet dainna gilvui, gos sáhttet olles 10 000 ruvnnu vuoitit.
– Mun bovden buot luohteberošteddjiid odne eahkedis juoigankursii neahta badjel – sihke juigiid ja sin geat háliidit oahppat juoigat, lohká Anti kurssa birra.
Oktasaš luohti Ávvirii
Kursa maid Anti doallá odne eahkedis lea nuvttá, muhto dat addá aŋkke oasseváldiide vejolašvuođa vuoitit 10 000 ruvnnu.
– Dán juoigankurssas mii ovttas dahkat luođi Ávvirii. Oallugiin soaitá miella searvat Ávvira gilvui, muhto soaitá veahá váttis okto bidjat luođi. Danne smihtten mun ahte mun doalan juoigankurssa, gos mii ovttas smiehttat šuoŋa ja dajahusaid luohtái, lohká Åse Márgget.
Juoigankursa neahta badjel
Anti doallá juoigankurssastis neahta badjel, nu gohčoduvvon Zoom badjel. Zoom lea videogulahallanbáiki, gos buot oasseváldit čohkkájit iežaset dihtora duohken ja gulahallet eará oasseváldiiguin.
Otná juoigankursa boahtá bisttit sullii diimmu, ja Åse Márgget Anti sávvá ahte olbmot servet.
Fállagoahtá juoigankurssaid
Åse Márgget Anti lea dovddus čeahpes juoigi, ja lea ge olu bargan luđiin.
Son lea áŋgiris juoigi, ja lea olu olbmuid oahpahan juoigat.
Dán Facebook-siiddus maid lea ráhkadan, «Juoiganmokta», muitala ge iežas áigut neahta badjel oahpahišgoahtit luođi viidáseappot.
– Áiggun álgit fállat juoiganoahpahusa neahta badjel dán čavčča mielde «Juoiganmokta» Facebook-siiddus. Lean ožžon olu jearaldagaid ahte in go sáhtášii doallat juoigankurssaid, muhto dađi bahábut in olle juohke guvlui. Danne jurddašin ahte interneahtta sáhttá leat buorre reaidun kurssaide, lassin deaivvademiide mat mis bohtet leat, dadjá Åse Márgget.
Ihttin dievvá áigemearri
Ávvira 10 jagi ávvudeami oktavuođas heivege vuohkkasit ahte aviisa oažžu luođi.
Váldodoaimmaheaddji, Kari Lisbeth Hermansen, čilge ahte luođi áigot geavahit aviissa doaluin, márkanfievrrideami oktavuođas ja eará oktavuođain mat lunddolaččat gusket aviissa doibmii.
– Luohti galggašii govvidit aviissa ja dan doaimma mii mis lea sámi servodagas, lohká váldodoaimmaheaddji Kari Lisbeth Hermansen.
Ihttin, borgemánu 16. beaivvi dievvá áigemearri sáddet sisa luođi Ávvirii. Searvva don ge!
Luođi sáddet ná:
Sáhtát báddet mátketelefovdnii, dahje studios. Jus ii leat gelbbolašvuohta dan dahkat de váldde Ávviriin oktavuođa. Luođi sáddet epoasttain dahje sms nilsjohan@avvir.no, mobiltelefuvdna +47 46633770
Eambbo dieđut: Neahttadoaimmaheaddji Berit Marie Lise Eira tlf. +47 932 92 115 dahje váldodoaimmaheaddji Kari Lisbeth Hermansen, tlf. +47 478 26 320
