– Jáhkken lei juoga ealli diŋga!

1. Man olu sáhttá jiekŋaguovža ­deaddit?

– Ii go dat leat oalle lossat? Na dien mun in dieđe gal, muhto ferten dadjat 3-400 kilo! Boastut!

Rivttes vástádus: Sullii 800 kilo

– Nu lossat bat lea? Beali losit go jáhkken!

2. Mii lea Vulle Vuojaža dahje dárogillii Donald Duck biilašiltanummár?

– In mun dieid leat šat guhkes áigái lohkan. In láve šat dán áigge Donalda gal lohkat šat. Na mun dajan 13! Lei go nu? Boastut!

Rivttesvástádus: 313

3. Maid mearkkaša sátnevájas:«Ii guoli gotte, guhte lea árgi njuoskamis»?

– Mun in máhte in dien ge. Máid lohket, daja mat oktii vel? In leat gullan dien goassege. In mun dieđe maid dat mearkkaša! Boastut!

Rivttes vástádus: Dát muitala ahte ferte oasálastit praktihkalaš bargguin jus galgá birget.

Go Andersen ii vástidan riekta buot golbma vuosttaš gažaldaga, de son ii mannan viidáset gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dat lea dan duohken guđe ivnni vállje. Rukses árvalus lea váddáseamos, ja jus dan vástida riekta, de oažžu 15 čuoggá, alit árvalus lea nubbin váddáseamos ja das faske 10 čuoggá ja ruoná lea álkimus ja das oažžu 5 čuoggá.

Andersen vállje ruoná ivnni, ja mii jearrat sus dán árvalusa:

Gii sáhttá borrat vaikko maid, muhto jápmá jus attát čázi?

– Gii sáhttá borrat … Sáhtát go geardduhit? Na mii dat sáhttá? In mun oro máhttime in dien ge! Lea go lieđđi? Dat mis gal ealáska go čázi addá. Na mun in dieđe! Boastut!

Rivttes vástádus: Dolla

– Jaaaa … Jáhkken lei juoga ealli diŋga!

Oktiibuot: 0 čuoggá

Juohke gilvaleaddji beassá hástalit ođđa gilvaleaddji Ávvira geassegilvui. Andersen háliida hástalit Frode Utsi searvat Ávvira geassegilvui.

– Siidaguoimmi mun hástalan. Ammahal son máhttá veahá eambbo go mun!