– Ii dál jora oaivi!

1. Gii nevttii «Guovdageainnu stuimmit» filmmas Elle?

– Gii Elle lei? Dat eadni? Diet Juuso. In muitte movt dat lei, Juuso hal lei goit goargu. Movt bat lei ge namma. In muitte lei go Anne? Boastut!

Rievttes vástádus: Anni-Kristiina Juuso

2. Vállje rivttes sojaheami, mii lea perfeavttas

a) dieđálin b) ledjen diehtán c) lean diehtán

– Hm.. Amma hal dat gal lea a? Boastut!

Rievttes vástádus: c) lean diehtán

3. Mii elliid Guhkesruoida lea?

– Gal dat gal lea duot širáffa? Boastut!

Rievttes vástádus: Beana

Go Gaup ii vástidan riekta buot golbma vuosttaš gažaldaga, de son ii mannan viidáset gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dat lea dan duohken guđe ivnni vállje. Rukses árvalus lea váddáseamos, ja jus dan vástida riekta, de oažžu 15 čuoggá, alit árvalusas faske 10 čuoggá ja ruonás 5 čuoggá.

Gaup vállje rukses ivnni, ja mii jearrat sus dán árvalusa:

Mii lea dát: Dat lea dego gearpmaš mii manná čađa vuovddi, ja seaibi maŋis golgá?

– Na gal mun in dien dieđe. In dieđe sullii ge! Boastut!

Rievttes vástádus: Áibmi mas suotna maŋis

– Deaivvat riŋget juste go lean aitto lihkkan, ii dál jora oaivi!

Galle čuoggá oktiibuot: 0 čuoggá

Juohke gilvaleaddji beassá hástalit ođđa gilvaleaddji Ávvira geassegilvui. Gaup háliida hástalit Mikkel Andreas Eira searvat Ávvira geassegilvui.