– Ferten smiehttat dien

1. Goas lea geassejorggáldat?

– Geassemánu guoktegoalmmátlogát beaivvi. Dahje oktagoalmmátlogát. Dat láve leat dalle, dán jagi goit lei geassemánu.21. beaivvi. Dat lea 21. várra. Riekta!

Rievttes vástádus: Geassemánu 21. beaivvi. De beaivi jorggiha fas seavdnjada guvlui.

2. Man boaris lea varit?

– Varis boazu … Dat gal lea golbma jagi. Boastut!

Rievttes vástádus: Varit lea boazu mii lea beannot jagis gitta guovtte jahkásažžii.

3. Maid mearkkaša sátnevájas: «Ii jeage ii geđgiidge»?

– Ii jeage geađggi? Ahte geađgi manná maid čađa? Ii go son dat mearkkaš ahte ii nagot doallat čiegusvuođaid. Riekta!

Rievttes vástádus: Šlárva olbmo birra. Son muitala buot maid gullá.

Go Hætta ii vástidan riekta buot golbma vuosttaš gažaldaga, de son ii mannan viidáset gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dat lea dan duohken guđe ivnni vállje. Rukses árvalus lea váddáseamos, ja jus dan vástida riekta, de oažžu 15 čuoggá, alit árvalus lea nubbin váddáseamos ja das faske 10 čuoggá ja ruoná lea álkimus ja das oažžu 5 čuoggá.

Hætta vállje rukses ivnni, ja mii jearrat sus dán árvalusa:

Niillas oastá heastta 6000 ruvdnui. Jagi maŋŋel vuovdá heastta ja jođiha dan 7000 ruvdnui. De gáhtagoahtá ja oastá fas heastta ruovttuluotta ja máksá das 8000 ruvnno. Jagi maŋŋel mearrida fas vuovdit heastta ja dál jođiha dan 9000 ruvdnui. Jearaldat lea: Man olu dinii son heastta gávppašemiiguin?

– Ii maidege. Go dat oastá 6000 ruvdnui, ja de vuovdá 7000 ruvdnui, de dine 1000 ruvnno. De fas oastá 8000 ruvdnui heastta. De manná eret dat 8000 ruvnno. Mun ferten veahá smiehttat.. Son dine 2000 ruvnno. Riekta!

Rievttes vástádus: Vuosttaš gávppis dinii 1000 ruvnno. Nuppe háve oastá heastta 8000 ruvdnui ja jođiha dan fas 9000 ruvdnui, ja dine fas 1000 ruvnno. Niillas dine oktiibuot 2000 ruvnno.

Galle čuoggá oktiibuot: 17 čuoggá

Juohke gilvaleaddji beassá hástalit ođđa gilvaleaddji Ávvira geassegilvui. Hætta háliida hástalit Risten Elle Siri searvat Ávvira geassegilvui.