– Dál dieđán dien boahtte hávvái

1. Maid gohčodit čoarvvehis gusaid?

– Maid gohčodit čoarvvehis gusaid? Lea go son dat seamma go boazu? Mun dajan goallá ja nulpu. Nubbi Boastut! ja nubbi Riekta!

Rievttes vástádus: Goallá ja jollán.

– Dál dieđán dien boahtte hávvái.

2. Gii vuittii Sámi Grand Prix vuosttaš jagi go dat lágiduvvui?

– Gii bat dat lei.. In dien gal dieđe. Mun dajan Wenche Marie Hætta. Boastut!

Rievttes vástádus: Joavku Sáve, Kárášjohka.

3. Maid mearkkaša sátnevájas: «In áiggo šat dien máli fierrut»?

– Ammahal dat mearkkaša ahte ii hálit dohko vuolgit nuppes. Boastut!

Rievttes vástádus: Oaivvilda ahte lea geargan áššiin mii lea leamaš riidogaskaoapmin.

Go Buljo ii vástidan riekta buot golbma vuosttaš gažaldaga, de son ii mannan viidáset gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dat lea dan duohken guđe ivnni vállje. Rukses árvalus lea váddáseamos, ja jus dan vástida riekta de oažžu 15 čuoggá, alit árvalusas faske 10 čuoggá ja ruonás 5 čuoggá.

Buljo vállje ruoná ivnni ja mii jearrat sus dán árvalusa:

Mus ja dus lea dat, mun anán dan mii gullá dutnje ja don dan mii gullá munnje. Mii dat lea?

 – Namma. Riekta!

Galle čuoggá oktiibuot: 5,5 čuoggá

Juohke gilvaleaddji beassá hástalit ođđa gilvaleaddji Ávvira geassegilvui. Frode Utsi lea hástalan Mikkel Isaksen Buljo, ja son fas hástala Stig Rune Smuk.