Badjelaš jahki lea golihan dan rájes go Tromsalaš Ingvar Olsen vuittii Idol lávlungilvvu ja son ii leat gullon bearehaga dan rájes.
Badjelaš jahki lea golihan dan rájes go Tromsalaš Ingvar Olsen vuittii Idol lávlungilvvu ja son ii leat gullon bearehaga dan rájes.
Dál besset Guovdageainnus gullat Ingvar Olsena go boahtá konsearta doallat hoteallas Guovdageainnus. Ii goassege ovdal leat Idol vuoiti doallan konsearta Guovdageainnus. Ingvar Olsenis lea sierralágan dološmállet lávlunstiila ja musihkka, ja lei ge dainna stiillain son vuittii Idol gilvvu 2014s. Maŋŋel go vuittii de lea son bargan ollu báddet ođđa lávlagiid mat ilbme mannan čavčča.
Somá geahččalit earálágan
Dasa gal illuda Guovdageainnu Thon hotealla direktevra Knut Vidar Alseth, gii lea bovden Olsena Guovdageidnui.
– Son lea čeahpes musihkkár ja lean hupman su manageriin diibmá ja šattaime ovttaoaivilii ahte Ingvar Olsen boahtá Guovdageidnui ođđajagis, lohká Alseth gean mielas lea somá geahččalit vehá earálágan fálaldagaid.
Mielas váldit sjánssa
Vaikko oidnojit olbmot jearrame gii dat Ingvar Olsen lea, de leat ollugat geat dihtet gii son lea.
– Ledjen rehkenastán ahte eai soaitte diehtit gii son lea, muhto lean hui mielas váldit dán sjánssa, ja lea hui somá. Muhto leat ollugat maid leamaš positiivvalaččat hirpmahuvvan, muitala Alseth.
Illuda boahtit Guovdageidnui
Ingvar Olsen illuda boahtit Guovdageidnui, ja lea ge vuosttaš konsearta maid son doallá maŋŋel go lea almmuhan EP mannan čavčča Tromssas.
– Mun lean máŋgii leamašan Guovdageainnus ja lean hui buorre Guovdageidnui, muhto mus ii leat leamaš doppe konsearta ovdal. Mus leat fuolkkit Guovdageainnus eret geat ledje mu geahččame juohke bearjadaga go Idolgilvu lei tvs, muitala Olsen ja joatká:
– Lean hui ilus go Guovdageaidnu lea vuosttaš báiki gos doalan konseartta ja mun illudan lávket lávdái Thon hoteallas, loahpaha Olsen ja sávvá buohkaid bures boahtin konsertii.
Ingvar Olsen čuojaha ge Guovdageainnu Thon hoteallas ođđajagimánu 30. beaivvi diibmu 22.00.
Geahča filmmaža go Ingvar Olsen lávlu «Waking»:
