Ávvir lea dál vuorbádan vuoiti 2500 olbmo gaskkas geat leat liikon min facebook-siiddu. Vuoiti lea Kirsten Gaup.
Ávvir lea dál vuorbádan vuoiti 2500 olbmo gaskkas geat leat liikon min facebook-siiddu. Vuoiti lea Kirsten Gaup.
– Åh man somá, iPad mus ii leat ovdalaččas. Dát gal lei buorre álgu ođđa jahkái, logai vuoiti Kirsten Gaup, go Ávvir riŋgii sutnje.
1 775. liikojeaddji
Gaup orui sákka illudeamen, go ságastallamis máŋgii himihii ahte lei nu somá vuoitit.
– Oba somá go mun maid vuoittán juoidá. Mun ledjen gullan dien vuorbádeami birra, muhto in lean muitimin dien šat, čilge son.
Go vuorbádeimmet vuoiti de gesiimet logu gaskkal 1 ja 2500 ja de gárttai ge nummar 1775 vuoitolohkun, ja Kirsten Gaup lei 1 775:t olmmoš guhte lea liikon min facebook-siiddu.
Dál juste leat 2 589 olbmo liikon min siiddu, dat 89 maŋimusa eai lean mielde vuorbádeamis.
Čuovvu áŋgirit Ávvira
Kirsten Gaup lei barggus Guovssahas sámi mánáidgárddis, go Ávvir válddii suinna oktavuođa. Son orruge Tromssa gávpogis, muhto lea Guovdageainnus eret. Son muitala iežas áŋgirit čuovvut Ávvira siiddu facebookas.
– Jua, go lean facebookas de láven fitnat lohkamin ođđasiid. Lea jalla somá lohkat ođđasiid ruovttuguovllus ja oppa Sámis. Vaikke mun dávjá riŋgen ge ruoktot eadnái, oappáide ja vieljaide, de eai soaitte sii daid seamma ságaid muitalit go mat Ávviris leat. Láve maid somá lohkat ságaid nu mo geat leat mánáid ožžon ja eará ruovttubáikkeságaid, muitala son.
Govven: Berit Marie Lise Eira
Eatnigiella divrras
Kirsten Gaup lohká sámegiela alcces dehálažžan.
– Vaikke mun barggan sámi mánáidgárddis gos human sámegiela juohke beaivvi, de lea maid somá beassat lohkat ođđasiid eatnigillii. Mus lea muđuid dárogielat biras dáppe, ja eatnigiella šaddá divrrasin go olmmoš orru gávpogis, loahpaha vuoiti.
Mii Ávviris giitit buohkaid geat leat liikon min facebook-siiddu, ja sávvat ain eambbosiid liikot dan. Mii sávvat maid lihkku vuoitái, dál beassá iPad bokte čuovvut min.
