– Váivi go olmmoš ii jurddaš guhkkelii

Namma: Issát Ailo Gaup

Ahki: 31, fargga 32

Guovlu: Guovdageaidnu

Bargu: Boasta ja COOP

1. Felgen Orkestera lávlla “Beaivelottážat” álgá ná: «Rukses almmis mun oainnán…» movt joatká teaksta?

– Dan gal in oba dieđe ge. Lean sihkkarit gullan, muhto in muitte. BOASTUT!

Rievttes vástádus: «..du čáppa govva lea darvánan».

2. Sámiid dološ oskkus ledje nissonipmiliin iešguđetlágán doaimmat. Mii lei Juoksaáhká doaibmá?

– Mii bat dál lei ge? Mun in oba muitte ge. BOASTUT!

Rievttes vástádus: Várjalit bárdnemánáid ja addit daidda bivdosearaid.

– Oja, mun jurddašallen nieidamánáid várjalit, dadjá Gaup gažaldaga birra.

3.Suoidemánu 1985 čievččai Sápmi Åland vuostá. Goabbá vuittii čiekčamiid?

– Dat gal ferte leat Åland. BOASTUT!

Rievttes vástádus: Sápmi (4-2 šattai boađusin).

– Ha-ha, vuoitán bat dat leat ge čiekčamiid, dat ii leat bahá ge.

Go Gaup ii vástidan riekta buot golbma vuosttaš gažaldaga, de son ii mannan viidáset gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dát lea dan duohken guđe ivnni vállje. Rukses árvalus lea váddáseamos, ja jus dan vástida riekta de oažžu 15 čuoggá, alit árvalusas faske 10 čuoggá ja ruonás ges 5 čuoggá.

Gaup vállje rukses ivnni ja mii jearrat sus dán árvalusa:

Dat manná vulos ja bajás, muhto goitge lea álo jaska. Mii lea dat?

– Hmm.. Mun jurddašan temperatuvra, muhto dan in jáhke. Na mun ferten dušše vástidit temperatuvra. BOASTUT!

Rievttes vástádus: Tráhppá

– He-he-he.. Huff lea váivi go olmmoš ii jurddaš guhkkelii. Dat manai hejot. Son gii jearai gažaldagaid, ii deaivan jearrat dakkár gažaldagaid maid mun máhtán, boagusta ja leaikkastallá Gaup.

Galle čuoggá oktiibuot: 0 čuoggá

Juohke gilvaleaddji beassá hástalit ođđa gilvaleaddji Ávvira geassegilvui, ja Gaup háliida hástalit Jonne Sikku searvat Ávvira geassegilvui.

Ánne Márjá Guttorm Graven lea ain njunnošis min geassegilvvus, son faskii 21 čuoggá.

Dát ášši lei Ávvira báberáviissa borgemánu 4. beaivvi.