Almmuhus

Almmuhus

– Okta čuokkis buoret go ii mihkke!

Vuorkágovva: Ovlla Gaup

Sámedikkeáirras Johan Vasara lea vuosttaš olmmoš guhte lea searvan Ávvira geassegilvui.

Almmuhuvvuon: 
Gaskavahkku, 1 Suoidnemánu, 2015 - 17:47
Ođastuvvon: 
Ođastuvvon: 02.07.2015 - 09:42
Fáddásánit: 

Geassegilvu:

Dán gilvvus lea mihttu čoaggit čuoggáid. 

 

Álgovuorus leat 3 gažaldaga, jus daid vástida riekta de manná viidáseappot. Juohke rievttes vástádusas oažžu 1 čuoggá. Jurddašanáigi: 20 sekundda.

 

De álget liigegažaldagat maid galgá vástidit 10 sekunddas. Liigegažaldagain oažžu 1 dahje 3 čuoggá, dan mielde makkár ivnni vállje; rukses dahje alit. Rukses gažaldagat leat váddáseappot. Gilvaleaddji manná viidáseappot nu guhká go vástida riekta liigegažaldagaid. 

 

Jus ii vástit áigemearrái, de manaha čuoggá.

 

Juohke gilvaleaddji beassá vel geahččalit vástidit ovtta árvalusa mainna sáhttá oažžut 5, 10 dahje 15 čuoggá, dan mielde makkár ivnni vállje; rukses, alit dahje ruoná. Rukses árvalus lea váddáseamos ja jus dan máhttá, de oažžu 15 čuoggá. Alit árvalusain oažžu 10 čuoggá ja ruoná árvalusain 5 čuoggá. Árvádusaid smiehttanáigi lea 1 minuhta.

 

Buohkat geat leat mielde Ávvira geassegilvvus ožžot Flax-vuorbbi. Dat gii nagoda čohkket eanemus čuoggáid vuoitá iPad-mini.

 

Juohke gilvaleaddji beassá hástalit ođđa gilvaleaddji Ávvira geassegilvui.

 

Ávvira bargit ja sin bearrašat eai sáhte searvat gilvui. 

 

Gilvoáigodat 01.07.15-15.8.15.

 

Namma: Johan Vasara

Ahki: 27

Guovlu: Guovdageaidnu

Bargu: NAV vuosttaškonsuleanta

 

Álggos leat golbma gažaldaga, jus daid máhtát, de manat viidáseappot gilvvus.

1. Go galggat ráhkadit marsipána, mat leat dat guokte diŋgga maid don fertet vel lasihit monnevielgadassii?

– Oi, hehe. Guokte diŋgga vel go?

Na, mun vástidan jáffuid ja jáffosohkkara.

Rievttes vástádus: Mandela ja jáffosohkkara, 0 čuoggá Johan Vasarai

 

2. Makkár brihttalaš musihkkajoavku lea dat mii lávlu «Walk of Life» lávlaga?

– Hmm. In leat gal dien lávlaga goasse gullan. Mun geahččalan vástidit Monty Python.

Rievttes vástádus: Dire Straits, 0 čuoggá

 

3. Galle juolggi ledje Odina heasttas?

– Odina heasttas ledje gávcci juolggi, vástida Vasara jođánit.

 

Go Vasara ii vástidan riekta buot golbma vuosttaš gažaldaga, de son ii mannan viidáset gilvvus. Muhto son beassá geahččalit vástidit ovtta árvalusa mainna sáhttá oažžut 5, 10 dahje 15 čuoggá, dan mielde makkár ivnni vállje. Rukses árvalus lea váddáseamos, ja jus dan máhttá, de oažžu 15 čuoggá. Alit árvalusain oažžu 10 čuoggá ja ruoná árvalusain 5 čuoggá.

 

Johan Vasara válljii alit ivnni ja de oaččuige dán árvalusa: Mii dat lea mii šaddá alladit ja ii unno goassege?

– Oi, alladit go. Dat ferte leat nu báljo go … In mun fuobmá dal. Mun geahččalan vástidit muorra. 

Rievttes vástádus: Ahki, 0 čuoggá

Galle čuoggá oktiibuot: 1 čuokkis

 

– Gal jur ledje gal oba váttis gažaldagat. Goit dat árvalus lei váttis, eat hal mii leat hárjánan diekkár árvalusaide mánáidskuvlla rájes. Muhto gal okta čuokkis lea buoret go ii mihkke, lohká Vasara.

 

Juohke gilvaleaddji beassá hástalit ođđa gilvaleaddji Ávvira geassegilvui ja Johan Vasara háliida hástalit Fred Rene Buljo searvat Ávvira geassegilvui.

(Ášši lea maid otná báberáviissas)

 

Ovdasiiddus dál