– Ii go son dán jagi mana buorebut

Namma: Silje Karine Muotka
Ahki: 40
Guovlu: Unjárga
Bargu: Sámedikki ráđđelahttu
 

1. Guhte dáin lea máilmmi stuorámus suolu:
A: Ruonáeana
Á: Austrália
B: Stuora-Británnia

– Hmm. Stuorámus suolu. Ii go Austrália leat kontineanta? Na mun vástidan Austrália. BOASTUT
 

Rievttes vástádus: Ruonáeana

2. Gii vuittii Sámi Grand Prix juoiganoasi dán jagi?

– Johan Anders Bær, vástida Silje jođánit. RIEKTA

3. Man boaris lea Guovdageainnu sátnejođiheaddji, Klemet Erland Hætta?

– Na, son lea 43. BOASTUT
 

Rievttes vástádus: 42 jagi

Go Silje ii vástidan riekta buot golbma vuosttaš gažaldaga, de ii beassan viidáset dán gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dát lea dan duohken guđe ivnni vállje. Rukses árvalus lea váddáseamos, ja jus dan vástida riekta, de oažžu 15 čuoggá, alit árvalusas faske 10 čuoggá ja ruonás ges 5 čuoggá.
 

Silje vállje alit ivnni ja mii jearrat sus dán árvalusa:

Mii dat lea mii šaddá alladit ja ii unno goassege?

— Hmm. In leat áibbas sihkar, muhto árvalan … Várit, dat rievddadit jagis jahkái eatge mii oba fuomášge. BOASTUT

Rievttes vástádus: Ahki

Galle čuoggá oktiibuot: 1 čuokkis

Silje lea diibmá leamaš mielde gilvvus, ja searvvai dán jagi maid.

– Diibmá manai funet, ii go son dán jagi mana buorebut.

Juohke gilvaleaddji beassá hástalit ođđa gilvaleaddji Ávvira geassegilvui. Silje hástala NSR jođiheaddji, Beaska Niillasa searvat dán gilvui.

– Suinna soaitá mannat buorebut gilvvuin go muinna, dadjá Silje.
 

_{Njunnošis: Lemet Ánde Stueng 16 čuoggá}