Namma: Marit Kirsten Anti Gaup
Ahki: 55 jagi
Guovlu: Kárášjohka
Bargu: Davvi Girjji ekonomiijakonsuleanta
Álggos leat golbma gažaldaga, jus daid máhtát, de manat viidáseappot gilvvus.
1. Galle gacca leat bussás oktiibuot?
– Mus lea gal dáppe veahkki, ferten gullat diehtá go son. Na, mun geahččalan vástidit ahte bussás leat 12 gacca.
Rievttes vástádus: 18 gacca
2. Masa adno áhci?
– Áhci go, dat gal ferte leat Guovdageainnu suopman, go mun in leat gullan dien sáni ovdal, muhto mu veahkki gal diehtá gii lea guovdageaidnulaš. Son lohká ahte dat adno suinniid heaŋgut goikkadeapmái.
Riekta
3. Biibbalii leat čohkkejuvvon ollu girjjit, galle girjji leat das?
– Ii biibbal gal gávdno eará guokte. Ođđa ja boares… Vai oaivvilda go sisdoalu biibbalis?
Áigi manihii ovdal go son háhppehii vástidit, nu ahte de son manahii čuoggá.
Rievttes vástádus: Biibbalis leat 66 girjji
Juohke gilvaleaddji beassá vel geahččalit vástidit ovtta árvalusa mainna sáhttá oažžut 5, 10 dahje 15 čuoggá, dan mielde makkár ivnni vállje; rukses, alit dahje ruoná. Rukses árvalus lea váddáseamos ja jus dan máhttá de oažžu 15 čuoggá. Alit árvalusain oažžu 10 čuoggá ja ruoná árvalusain 5 čuoggá.
Marit Kirsten lohká ahte son gal juo váldá dan buot váddásepmosa go juo galgá. De son oaččui ge dán árvalusa:
Mii lea dat mii boradettiin orru jávohaga, muhto go baikigoahtá, de bárggáda?
– Mii bat jur dat ges lea. Dat gal ferte leat buoskkas, čaimmiha son.
Rievttes vástádus: Bissu.
Galle čuoggá oktiibuot: 1 čuokkis
– Diet goalmmát gažaldat ii lean nu čielggas, mun in riekta ádden dien gažaldaga. Muhto muđui gal ledje gažaldagat áibbas «okei», lohká Marit Kirsten.
Juohke gilvaleaddji beassá hástalit ođđa gilvaleaddji Ávvira geassegilvui. Marit Kirsten Anti Gaup háliida hástalit Ellen Kirsten Anti searvat Ávvira geassegilvui.
Geassegilvu lea maid deaddiluvvon otná áviissas.
