Avinor dieđiha ahte Lulli-Norggas lea buot girdijohtolat bissehuvvon duorastat iđida go Oslo dárkkistanguovddážis lea teknihkkalaš boasttuvuohta.
– Mátkkošteaddjit fertejit ráhkkanit guhkes maŋŋonemiide. Dál eat vuos dieđe man guhká fertet vuordit ovdal johtolat fas rahpasa. Mii bivdit buot mátkkošteddjiid čuovvut dieđuid maid ožžot iežaset girdifitnodagain. Mii šállošit váttisvuođaid maid dát dagaha. Dá leat visot dieđut mat mis leat ášši birra dál, ja mii dieđihit go mis leat eambbo dieđut, dieđiha Avinor.
Oslo girdihámmanis, Gardermoenis, loktanii maŋemus girdi diibmu guđas.
Dego dábálaččat
Avinor lea duođaštan NTB:i ahte ovdalaš beal čieža lea juoga dáhpáhuvvan.
– Mii bargat visot maid nákcet vai gávnnašeimmet boasttuvuođa ja vai johtolat fas doaibmagoađášii, muhto lea vuos beare árrat dadjat goas, dadjá Avinor gulahallanhoavda Kristine Framholt NTB:i.
Son dattege bivdá mátkkošteddjiid mannat girdihámmaniidda nu go dábálaččat livčče dahkan.
– Jus girdifitnodat ii dieđit maidege eará, de daga nu go dábálaččat, rávve son.
Jáhkkimis besset seaivut
– Girdit mat ledje áimmus bajábealde Lulli-Norgga go diehtu bođii, besset jáhkkimis seaivut, dadjá Bergen girdihámmana, Fleslanda, doaibmi hoavda Øystein Skar Bergensavisenii.
Skar árvvoštallá ahte eará girdit eai loktan ovdal go ášši lea luovvanan.
