-Almmuhus-
-Almmuhus-
-Almmuhus-
OĐĐASAT– Dál jorgalan sealggi vealaheddjiide

– Dál jorgalan sealggi vealaheddjiide

-

-

Tor Asle Varsi vásihii badjelgeahččanvuođa sihke politihkas ja servodagas. Dál lea jorgalan sealggi vealaheddjiide dainna lágiin ahte ovdalaš gielddaválggaid vuolgá sihkkelastit Norgga geažusgeahčái.

Njeallje jagi leat gollan dan rájes go sirbmálaš Tor Asle Varsi rasttildii Norgga vácci. Dalle váccii Lindesnesas Davvenjárgii ja Sirbmái čalmmustahttin dihte Norgga gárrenmirkkopolitihka.

Dál áigu Varsi nuppes rasttildit Norgga, go boahtte vahkus duolmmasta sihkkeliin Girkonjárggas Lindesnesii ja Osloi. Dán háve ges čájehit vuostehágu vealaheapmái ja badjelgeahččanvuhtii, go iežas lohká vásihan dan maŋŋel go searvvai politihkkii.

 

Geassádan politihkas

Son lea geassádan Deanu gielddastivrras maŋŋel go dovddai vealaheami. Politihkalaš áŋgiruššama oktavuođas geahččalii Varsi máŋgii háhkat dieđuid áššiide, muhto son vásihii ahte gielda ii vástidan su jearaldagaide.

 Son muitala muhtin konkrehta dáhpáhusa birra mii guoskkai meahcástallamii. Varsi bivddii soames eará politihkkára maiddái háhkat dieđuid, ja son gal oaččui moadde beaivvi maŋŋel vástádusa gielddas. Sirbmálaš lea beannot jagi maŋŋel ain vuordimin.

– Go dieđihin ahte geassádan politihkkárin, de čilgejin čálalaččat Deanu gielddastivrii man láhkai vealahuvvojin. Ii okta ge čájehan beroštumi, ja danin dulkon ahte gielddastivra ovttajienalaččat dohkkeha vealaheami

Tor Asle Varsi

Šiitá Varsi čuoččuhusaid

Deanu sátnejođiheaddji Frank Ingilæ šiitá Varsi čuoččuhusaide ja dadjá váidalahttin go bellodatustit vásiha dáhpáhusaid vealaheapmin.

 – Mii leat geahččalan čoavdit čuolmmaid ja láhččit dili nu ahte Varsi searvvašii áŋgirit politihkkii go son lea čeahpes almmái. Gielddastivra ii leat luvven su politihkalaš doaimmain, muhto Varsi ii leat máŋgga jahkái boahtán čoahkkimiidda. Tor Asle Varsi lea buollisearra, son áŋgiruššá ja son lea buoredan gieldda joatkkadivššu. Son lea buorre olmmoš, muhto muhtimin leat sus menddo garra čuoččuhusat. Su mátkkit čalmmustahttet hástalusaid, muhto politihkas livččii nagodit eanet rievdadit. Mu mielas lea boastut jorgalit midjiide sealggi sihkkelmátkkis, livččii eanet riekta gulahallat, čilge Ingilæ.

 

Ii leat vuoigatvuohta oaivvildit maidege

Go Tor Asle Varsi lei divššus Finnmárkkuklinihkas alkoholismma geažil, de muitaledje ahte rabasvuohta lea dehálaš vai birge. Seammás čilgejedje ahte dát sáhttá soardit, ja dan lea Varsi beassan vásihit.

 – Mun muitalin iežan birra aviissain, TV:s ja rádios, mun muitalin mo dilli lei go juhken:

Mu rabasvuohta lea addán earáide vejolašvuođa mu duolbmut. Lean vásihan dán máŋgga sajis, olbmot dihtet ahte lean ovddeš juhkki ja danin jáhkket ahte lean analfabehta. Buot lea smihttojuvvon min ovddas, ja mis ii leat vuoigatvuohta oaivvildit maidege. Mu mielas lea unohis dáhpi givssidit, vealahit ja olgguštit sin geaid navdet heajubun go iežas. Mu áigumuš lea sihkkelmátkkis jorgalit sealggi sidjiide geat vealahit, go mun háliidan ahte olbmot galget jurdilit makkár váikkuhusat vealaheamis ja givssideamis sáhttet.

 

Ii háliidan šat eallit

Maŋŋel guhkes vázzinmátki oaččui Varsi olu beroštumi. Norgga dearvvašvuođaministtar bovdii su Stuoradiggái ja maiddái sámi politihkkárat dáhtto suinna digaštallat gárrenmirkopolitihka, mediat ges čálle ja muitaledje su áŋgiruššama birra. Muhto Varsi vásihii maiddái ahte su historjjá ávkkástalle boastut, eai buot politihkkárat čuovvolan nu go lohpidedje ja mediat jaskkodedje oalát go háliidii muitalit vealaheami birra. Eallin šattai lossadin, Varsi geassádii politihkas ja dovddai olggušteami.

 – In dieđe lei go gáđašvuohta vai mii. Dáppe gilis maid vealahuvvojin. Olbmot savkkástalle ja hálle mu birra sealggi duohken. Olbmot heite munnje hálešteamis, ja dat lei hui lossat. Mun leamaš hui bodnis, muitala Tor Asle Varsi.

 

Háliida ásahit riikasearvvi

2006:s nagodii sirbmálaš bidjat eret viinni. Son lea dan rájes áŋgiruššan gárrenmirkkopolitihkas go oaidná dárbbu buoredit joatkkadivššu Norggas.

 – Mus lea oktavuohta oallugiin geat jerret ráđiid. Juohkehaš ferte okto doarrut ja danin jáhkkán ahte soaitá áigi ásahit riikasearvvi ovddeš gárrenmirkkogeavaheddjiide. Dán maid áiggun čalmmustahttit sihkkelmátkkis. Go gárrenmirkkogeavaheaddji boahtá divššus, de čuožžilit váttisvuođat ja máŋgii vearrána jugešvuohta. Heajos joatkkadivššu dihtii sáhttá dikšu mannat duššái, dalle lea alkoholageavaheaddji dušše fitnan vuoiŋŋasteamen. Mii fertet kártet dárbbuid, ja sierra riikkaservviin šattašeimmet gievrrat go bargat eiseválddiid vuostá. Dál leat Norggas dušše máŋga smávva organisašuvnna, ja danin lea politihkkáriin váttis minguin gulahallat, dadjá Varsi.

(Ášši lea almmuhuvvon báberaviissas 14.08.15)

 

-Almmuhus-